Bjarni og Allan spæla fyrstu finaluna um íslendska meistaraheitið í kvøld

Teir royndu í fjør, men tá gekk tað ikki móti einum ungum og svongum Fram-liði. 

Áðrenn hetta kappingarárið varð Valur mett sum stóri favoritturin í íslendskum manshonbólti, og tað hevur liðið við føroysku landsliðsspælarunum livað upp til í ár:

Valur vann grundspælið og hevur syft alla mótsstøðu í endaspælinum higartil: 2-0 í dystum móti HK í fjórðingsfinalunum og 3-0 í hálvfinaludystunum móti KA, gamla felagnum hjá Allani Norðberg: Ógvuliga sannførandi hjá Vali.

Allan Norðberg hevur vunnið European Cup við Vali 

Næstu tíðina skal liðið úr Reykjavík við teimum báðum uppruna StÍF'arunum royna at fáa gullið í hús. Hetta í finaludystum móti FH, sum Dánjal Ragnarsson og Janus Dam Djurhuus vunnu meistaraheitið við í 2023.

Fyrsta finalan verður spæld í kvøld klokkan 19.30 føroyska tíð, tá FH vitjar á Hlíðarenda í Reykjavík.

Bjarni í Selvindi og Allan Norðberg kunnu fáa stóran leiklut í finalurøðini, ið eins og í Føroyum fevnir um minst tríggjar dystir - i mesta lagi fimm.

Fyrsta liðið at vinna tríggjar finalur gerst íslendskur meistari - sí skránna her