Dagsins spælari og á vikuliðnum í Superliguni: - Uttan hann hevði Frederica tapt

- Um man kennir støðuna hjá Lamhauge, so setur man eyka prís uppá hansara avrik. Lamhauge varð á órættvísan hátt vrakaður fyri nøkrum vikum síðani men kom í kvøldsins dysti aftur á flottan hátt og við nøkrum beinleiðis frálíkum bjargingum. Uttan hann hevði FC Fredericia helst tapt.

Hetta staðfestir Morten Bruun, viðmerkjari og fyrrverandi landsliðsspælari, tá hann á TV2 kjósar dagsins spælara í Frederica - Vejle.  

Føroyski landsliðsmálverjin stóð ein branddyst í ilfýsna veðrinum, og var ein høvuðsorsøk til at Fredericia yvirhøvur fekk stig móti Vejle. Hetta millum annað við eini trimum stórum bjargingum og tryggum spæli yvirhøvur.

Sí eisini: Mattias Lamhauge fekk møguleikan aftur - og tók av.

Sí hæddarpunkt frá í gjár - millum annað nakrar góðar bjargingar hjá Mattiasi - her

TV2 hevur eisini Mattias Lamhauge á almenna vikuliðnum fyri 8. umfar í fremstu donsku deildini.

Skíggjamynd: TV2 

Føroyski málverjin fær, umfamt í ymiskum miðlum, eisini rós millum egnar fjepparar á sosialu miðlunum.

- Sjálvandi skal Lamhauge nú verða fyrsti málverji

- Hann hevur ongantíð gjørt nakað fyri at spælt seg av

- Hann hevur prógva seg aftur og aftur og víst stóra sinnisliga styrki

Hetta eru millum tingini, sum Fredericia-fjepparar skriva undir uppsløgum á Facebook-síðu felagsins.

Høvuðspersónurin sjálvur úttalaði seg eisini til TV2 eftir dystin í gjár.

- Tað er sjálvandi ein heldur serstøk støða, at vit skifta eitt sindur á málmansplássinum. Men eg havi bara fokus á næstu uppgávu (...) eg royni bara ikki at hugsa um tað og gera mítt besta.

Hoyr alla samrøðu hjá TV2 við Mattias Lamhauge her

Sí eisini - Mattias seta orð á støðuna í landsliðssteðnum: Mattias Lamhauge: - Ein serstøk avgerð sum eg varð bilsin av

Næsta uppgáva hjá Mattiasi Lamhague og Frederica er á Fjóni fríggjakvøldið móti OB. So er spurningurin, um Micheal Hansen hevur nakað annað val enn at byrja við Mattiasi aftur.

Venjarin hjá Fredericia staðfesti fyri TV2 eftir 1-1 dystin í gjár, at Mattias Lamhauge av álvara hevur tikið av møguleikanum.