Dennis Holm nýggjur formaður í FC Suðuroy

Tað er fyrrverandi borgarstjórin í Vági og frásøgumaðurin til heimadystirnar hjá besta mansliðnum í 2021, Dennis Holm, ið næsta árið skal vera formaður í FC Suðuroy.

Hetta er greitt, eftir at nýggja nevndin hjá FC Suðuroy skipaði seg á nevndarfundinum í gjár. Dennis Holm avloysir Julius Vest Joensen, ið var formaður í tíggju ár, áðrenn hann fyrr í vetur takkaði fyri seg.

Á aðalfundinum 11. desember varð starvsnevndin hjá FC Suðuroy mannað av nýggjum við sjey nevndarlimum. Fýra nýggir limir komu tá í starvsnevndina: Danjal Johan Joensen, Jákup Olsen, Dennis Holm, og Anna B. Samuelsen.

Umframt Dennis, ið er triðji formaður felagsins, hava aðrir nýggir limir fingið formansessir: Jákup Olsen er nú formaður í fótbóltsdeildini, og Dánjal Johan Joensen er formaður í ungdómsdeildini.

Nevndin hjá FC Suðuroy

Dennis Holm, formaður

Eyðbjørn Thomsen, næstformaður,

Óli Holm, kassameistari

Jákup Olsen, formaður í fótbóltsdeildini

Dánjal Johan Joensen, formaður í ungdómsdeildini

Kári í Lágabø, nevndarlimur

Anna B. Samuelsen, nevndarlimur

Besta mansliðið hjá FC Suðuroy flutti í heyst niður aftur í 2. deild. Besta kvinnuliðið er í samstarvi við TB og Royn, endaði nummar tvey í 1.deild í 2021 og skal næsta ár royna seg í Betrideildini.

Felagið ger í høvuðsheitinum nógv við ungdómsfótbóltin og hevur, uframt vøllin vesturi á Eiðinum, innandura høll (Marhøllina) til nýtslu.

Kelda: fcsuduroy.com