Fingu strítt seg til stig móti Andorra

Eftir seinasta bríksl við Djúpumýrar var eingin ivi um, í hvørji legu tað var størri nøgdsemi um javnleik. Andorra fekk eitt stig, eins og liðið gjørdi móti Hvítarusslandi í fyrsta umfari. Fyri Føroyar var talan um í øllum førum lítið vónbrot í fyrstu uppgávuni í undankappingini

Tað vóru tó Føroyar, ið noyddust at vinna seg á javnleik í seinna hálvleiki. Tað byrjaði annars heilt væl, og longu eftir lítið korter var 1-0. Eftir deyðbóltsstøðu vann føroyska liðið bóltin, ið varð snittaður víðari, Áki Samuelsen fekk tamt bóltin í brotsteignum og varð síðani feldur. Jørgen Nielsen var ísakaldur úr ellivu metrum, og eins og seinast U21 spældi heimadyst (Serbia fyri einum ári síðani), skoraði glyvramaðurin og legði harvið Føroyar á odda.


HB-leikarin verður feldur... (Mynd: Sverri Egholm)


... og B68-áleyparin umsetti til mál (Mynd: Sverri Egholm)



Andorra svaraði tó aftur, og kom til nakrar stórar møguleikar fyri steðgin. Tað eydnaðist eisini at javna. Hetta var miðskeiðis í fyrra hálvleiki eftir, at tað var ov lætt at bróta ígjøgnum í okkara høgru síðu, og eftir at Børge Petersen fyrst hevði blokerað skotinum, men at bólturin síðani fór í netið til 1-1.

Føroyar høvdu leikliga yvirvág, men megnaðu ikki at skapa so nógv: Vóru heldur óneyvir, kroystir mitt fyri, manglaðu møguleikar og Andorra arbeiddi og vardi væl. Tíðliga í seinna var galið aftur heldur lætt at koma til møguleikar móti Føroyum, og eftir at Ari í Haraldstovu Petersen hevði bjarga væl í fyrru atløgu, eydnast útiliðnum at prika bóltin í føroyska málið aftur.

Eftir at okkara skuldi koma yvir skelkin, reistust teir nakað, og meira broddur kom í álopsspælið. Brotið varð ígjøgnum síðunar nakrar ferðir, og útjavnandi málið kom, eftir at Olaf Bárðarsson rak inneftir, slepti bóltinum og at hann síðani varð spældur niðan á Jørgen Nielsen. Áleyparin spældi snilt víðari til Gutta Dahl-Olsen, sum tók bóltin víðari, og síðani setti hann framvið málverjanum við vinstra beinið til 2-2.

Hóast tað eydnast at leggja ávíst trýst á seinastu løtuna, so eydnaðist ikki føroyska liðnum at koma til heilt stóra málmøguleikan, og fáa triðja málið og harvið trý stig. Áki Samuelsen hevði frísparksroynd í yvirtíðini, men tað endaði 2-2. Harvið eitt stig til Eyðun Klakstein og liðið í fyrstu royndini.

Føroyska U21-landsliðið spælir aftur í september - á útivølli móti Hvítarusslandi og Kroatia.

U21 EM-undankapping
Fríggjadagin 16.06, við Djúpumýru
Føroyar - Andorra 2-2 (1-1) 
13' Jørgen Nielsen, br. (Áki Debes Samuelsen) 1-0
22' 1-1 Gerard Sola
58' 1-2 Guillem Acosta
74' Gutti Dahl-Olsen (Jørgen Nielsen) 2-2