Fótbóltur

Føroyar trý pláss fram á FIFA-styrkislistanum

Sigrarnir á Malta og Andorra hava ikki flutt Føroyar nógv longur fram á listanum - tó frá 110. til 107. pláss.

Mynd: Jens Kr. Vang

Mynd: Jens Kr. Vang

2020-09-17 17:25 Author image
Agnar Prestá
placeholder

Fyrst í hesum mánaðinum vunnu Føroyar tveir teprar sigrar: 3-2 á heimavølli móti Malta og síðani 1-0 í Andorra. Hetta var fyrrstu ferð í 23 ár, at Føroyar vunnu tveir dystir á rað í einari kapping - í 1997 var tað tveir 2-1 sigrar á Malta við ikki nógv meira enn einum mánaði ímillum. 

Í dag varð nýggjasti styrkislistin hjá FIFA almannakunngjørdur. Greitt er, at Føroyar eru farnar trý pláss fram. Í juli, tá listin seinast varð dagførdur, var føroyska A-landsliðið hjá monnum á 110. plássi. Sigrarnir hava givið 10 stig, og nú  eru Føroyar á 107. plássi. Hetta er beint frammanfyri Estland, og lond sum Føroyar taptu ímóti fyri tveimum árum síðani, Aserbadjan og Kosovo, eru stutt niðanfyri. Hini londini í bólkinum Lettland, Andorra og Malta er nakað væl aftanfyri - serliga Malta.


FIFA styrkislistin fyri september
Topp 10:

1. Belgia
2. Frakland
3. Brasil
4. Ongland
5. Portugal
6. Uruguai
7. Spania
8. Kroatia
9. Argentina
10. Kolumbia

16. Danmark
18. Svøríki
41. Ísland
44. Norra
56. Finnland

107. Føroyar
137. Lettland
138. Andorra
186. Malta

Næsta uppgáva hjá føroyska A-landsliðnum er 7. oktober, tá Danmark tekur ímóti í venjingardysti á MCH Arena í Herning. Tríggjar dagar seinni spæla Føroyar og Lettland á Tórsvølli, og tann 13. oktober er heimadysturin móti Andorra á skránni. Báðir dystirnir á Tórsvølli eru í Nations League.

placeholder
placeholder