FSF: Koronupass skal vísast við dyrnar

Á midnátt komu nýggju tilmælini hjá myndugleikunum í gildi, og í hesum sambandi minnir Fótbóltssambandið á, at tað nú verður neyðugt at vísa koronupass í sambandi við steypafinaluna hjá kvinnum, sum verður í Havn seinnapartin.

Tað er klokkan 17, at NSÍ og HB hittast á Tórsvølli. Dysturin sæst eisini á Rás 1.

Eingin avmarking er tó í mun til áskoðaratalið, men øll, sum eru 15 ár og eldri skulu vísa koronupass fyri at sleppa til dystin. Hetta merkir samstundis, at ikki er neyðugt at deila eysturskýlið í smærri bólkar, sum upprunaliga ætlað.

Fyri at vera í gildi skal eitt koronapass uppfylla eina av seks treytunum niðanfyri.

ES góðkent talgilt koronapass – til dømis tað danska ella føroyska – grundað á:

• lidna koppseting ikki eldri enn eitt ár,
  
• koronakanning ikki eldri enn 72 tímar ella
  
• PCR test, sum váttar fyrrverandi smittu seinasta árið

Harafturat ber eisini til at brúka hesi skjøl saman við passi ella koyrikorti:

• gula koppsetingarkortið, sum váttar koppseting seinasta árið,
  
• váttan um føroyska PCR kanning ikki eldri enn 72 tímar ella
  
• váttan frá landslæknanum um fyrrverandi smittu seinasta árið