Fyrsti kvinnuligi dómari í einum Champions League-dysti hjá monnum

Í fjør dømdi hon Super Cup finaluna millum Liverpool og Chelsea, og gjørdist stutt áðrenn tað fyrsta kvinnan sum dømdi ein dyst í Ligue 1 - bestu mansdeildini í Fraklandi. Í oktober leiddi hon ein Europa League-dyst í Leicester, og í gjár skrivaði Stephanie Frappart aftur søgu: 36-ára gamli dómarin úr Fraklandi dømdi dystin millum Juventus og Dynamo Kiev í bólkaspælinum í Champions League. Tað hevur eingin kvinna gjørt fyrr.

Stephanie Frappart dømdi eisini HM-finaluna hjá kvinnum í fjør, og má metast at verða fremsti kvinnuligu dómarin í heiminum. 

Frappart heilsar uppá Andrea Pirlo, høvusvenjara hjá Juventus (Myndir: EPA)

Juventus vann dystin 3-0. Frappart gav trý gul kort. Eitt annað merkisvert við dystinum var, at Cristiano Ronaldo skoraði sítt mál nummar 750 í einum proefessionellum dysti. Harvið er áleyparin úr Portugal 17 mál aftanfyri Pele og 22 aftanfyri Romario sambært almennu hagtølunum. Tað er bert eysturíksk-kekkiski áleyparin Josef Bican, ið hevur fleiri enn nevndu brasliumenninir. Frá1928 til 1955 skoraði Bican 805 mál í alemnnum dystum, og 35-ára gamli Ronaldo stríðist fyri at koma frammum hann.