Gilli heldur fram í Noreg

Gilli Rólantsson Sørensen skal nú flyta úr Bergen til Skien. Eftir at sáttmálin við Brann Bergen fór úr gildi undan jólum hevur áhugi verið fyri føroyska landsliðsleikaranum - bæði úr Noreg og úr øðrum londum.

Odds BK, betri kent sum Odd og fyrr Odd Greenland, endaði á 7. plássi á Eliteserien í fjør. Hetta var trý pláss frammanfyri Brann, og Odds BK fekk sjey stig fleiri, enn liðið ið Gilli Rólantsson spældi á. Tvøramaðurin hevur spælt 97 dystir í bestu norsku deildini.

Les eisini: Gilli heldur møguliga fram í bestu norsku deildini

Seinastu tíðina hevur Odds roynt at fingið fatur á Gilla, og nú hava partarnir skrivað undir ein tvey-ára sáttmála. 28-ára gamli landsliðsleikarin varð í morgun avdúkaður sum Odds BK-leikari.

Á tíðindafundinum varð millum sagt, at Gilli Rólantsson hóskaði perfekt til Odds við sínum royndum, atletisku evnum og persónligheit, umframt at hann kann spæla á ymsum plássum. Avdúkað varð, at Odds BK hevði hugt nógv eftir Gilla seinasta árið. 

Gilli segði sjálvur, at hann hevði verið í Føroyum eina tíð og umhugsað seg, men at Odds tyktist sum tað rætta staðið at spæla fótbólt næstu árini. Nú gleðir hann seg bara at koma í gongd, og tað sleppur hann beinanvegin. Av tí at hann kemur úr Føroyum, umframt at hann sjálvur hevur havt koronu, so sleppur Gilli Rólantsson undan sóttarhaldi.