HB: - Lassana Faye vísti Onnu Falkenberg virðing

HB hevur seinnapartin sent rættleiðing út til tíðindastubba, sum í gjárkvøldið var at lesa á heimasíðuni hjá Dimmalætting.

Í greinini verður ført fram, at HB spælarin Lassana Faye noktaði at taka í hondina á Onnu Falkenberg, sum er nevndarlimur í HB. Hetta skal hava verið, tá nýggi HB-spælarin kom til landið herfyri, og hann var og heilsaði uppá nevndina.

Hetta hevur skapt nógva øsing á sosialu miðlunum, millum fólk sum varnaðust at tað ikki var ein 1. apríl-søga, og mong hava skriva um vantandi virðing. HB vísir tó á í dag, at søgan als ikki sigur allan sannleikan.

- Greinin er skrivað á einum ógvuliga tunnum grundarlagi, sum gevur eina misvísandi mynd av støðuni. Vegna sína trúgv tekur spælarin, Lassana Faye, ikki í hondina á kvinnum. Hansara máti at heilsa virðiliga, er við at leggja hondina á hjartað og bukka. Nakað sum hann eisini gjørdi í hesu støðuni, sigur nevndin í Havnar Bóltfelag.

- Og tað er týdningarmikið at staðfesta, at hetta er ikki ein avvísing ella at vísa vantandi virðing fyri kvinnum. Men hetta er grundað á hansara persónligu trúgv og sannføring.

Anna Falkenberg, sum eisini er fólkatingslimur, er nevndarlimur í HB (Mynd: Sverri Egholm)

Síðan greinin kom út eru fleiri rastiskar viðmerkingar skrivaðar um spælaran. Hetta góðtekur HB ikki.

- Fótbóltur snýr seg um felagsskap, virðing og inklusión. Og tað er okkara vón, at bæði miðlar og almenningur virða hetta, soleiðis at vit kunnu fáa eitt virðiligt kjak um hetta. Í HB er pláss fyri øllum. Vit gera ikki mun á nøkrum vegna rasu, húðarlit, tjóðskaparligan ella etniskan uppruna, trúgv, kynsligan samleika ella brek, sigur nevndin í HB.

Lassana Faye kom til felagið í síðsta mánaða. Hann er niðurlendingur og er uppvaksin í Rotterdam. Hann hevur røtur til millum annað Senegal.