Hoyvíkskvinnur spæla báðar dystirnar í Spania

Kvinnurnar hjá H71 spæla báðar dystirnar í Evropa Cup á útivølli í La Guardia, Spania.

Tað er nú greitt, nú H71 og spanska felagið Club Balonman Atletico Guardes eru komin ásamt um at spæla báðar dystirnar í European Cup kappingini í Spania.

- Hetta var tann fíggjarliga skilabesta avtalan, og hóast vit altíð fyrst og fremmst ynskja at spæla heima, so mugu vit taka fíggjarlig atlit í sambandi við okkara altjóða luttøku.

H71 spældi seg í áttandapartsfinaluna 4. desember, tá tær við einari krútsterkari verju og nøkrum frálíkum einmansavrikum í álopspartinum megnaðu at hála sigurin í hús. H71 vann seinna dystin 29-24 og vann samanlagt 56-53.

- Vónirnar eru góðar, og liðið hjá okkum er longu farið í holt við at fyrireika seg saman við nýggja venjaratoyminum Simon Olsen og Djóna Gaard Joensen. Alexander Lein Martinsen heldur fram sum málverjavenjari hjá kvinnunum, skrivar H71 á heimasíðuni.

Fyrri dysturin verður spældur leygarkvøldið 14. januar klokkan 18 og seinni dysturin 15. januar, eisini klokkan 18.

Hoyvíkskvinnur fara úr Føroyum 12. januar og eru heima aftur 16. januar.

Sí eisini: Myndir: H71 - Slavia Praha

---

Jana Mittún um sigurin á Slavia Praha 4. desember