KÍ-kvinnur fáa styrk úr Svøríki

Hon hevur spælt við Østersund IF, ið næstbestu kvinnudeildini í Svøríki, men hevur verið uttanfyri við einum skaða seinastu tíðina.

KÍ kvinnurnar hava styrkt seg við einum leikara afturat. Tað er unnusdan hjá Lucasi Lund, fysioterapeuti hjá hjá besta mansliðnum hjá KÍ.

Emma Ljungdahl hevur drúgvar royndir í næstbestu deildini í Svøríki, har hon hevur leikt sum miðverji og á báðum bakkplássunum.

- Tað er avgjørt ein góður leikari, ið vit hava fingið inn á liðið. Hon er júst byrjað at venja aftur, eftir drúgvan skaða, og tí skal hon sjálvandi hava tíð at koma heilt fyri seg aftur. Tað er enn ikki greitt, hvussu vit koma at brúka hana, og hvussu skjótt tað verður, men tað er einki at ivast í, at hon hevur sterkan mentalitet, rutinu og góðar leiðslueginleikar, sigur høvuðsvenjarin hjá KÍ-kvinnunum, Allan Drost, við heimasíðuna hjá KÍ.

- Hetta var ein møguleiki, ið stakk seg upp, av tí at fysioterapeuturin á besta mansliðnum og Emma eru par, og hon hevur valt at flyta til Klaksvík. Tað halda vit er spennandi og við hennara eginleikum, kann hon avgjørt styrkja um liðið.

Allan Drost vísur á, at tey alla tíðina hyggja eftir hvussu tey kunnu styrkja KÍ liðið best møguligt. Men í løtuni hevur KÍ ein sera sterkan hóp, sum hann er sera væl nøgdur við, og tí eru ongar ætlanir um at fáa fleiri leikarar inn í summar.