Landsliðið mátti venda við

Eftir ætlan skuldi føroyska landsliðið í fótbólti, sum vann 1-0 í Andorra seinnapartin í gjár, lenda nakað eftir midnátt.

Men veður og vindur hevur gjørt, at teir ikki eru komnir til Føroya enn. Veðurlíkindini vóru ov vánalig í Vágum, og flogfarið hjá Atlantsflogi mátti seta kósina móti Aalborg í staðin.

Har hevur hópurin ligið nátt, og kemur í Vágar seinnapartin.

Nú verður steðgur í hjá A-landsliðnum hjá monnum í nakrar vikur. Í oktober eru tríggir dystir á skránni. Fyrst venjingardystur í Danmark móti danska landsliðnum 7. oktober og síðani tveir heimadystir móti Lettlandi og Andorra ávikavist 10. oktober og 13. oktober.