Leif Mohr Kring Føroyar: Fýra etapur og fýra sigrar

Suðuroyggin var karmur um 4. etapu av Leif Mohr Kring Føroyar. Súkklað var av Tvøroyri, til Hvalba, til Øravík, um Hovsegg, til Hov, til Porkeri, til Vágs, til Lopara og síðan gjøgnum Sumbiarbergholið. Vent var í Sumba og so gekk leiðin aftur gjøgnum tunnilin, og á mál í Vági.

Eins og undanfarin ár, so var málið við Effostøðina í Vági.

Teinurin var góðar 64 kilometrar, og tað tók vinnarinum beint yvir tveir tímar at koyra teinin. Vinnarin, Jákup Petur Eliassen, brúkti 2 tímar 7 minuttir og 15 sekund frá Tvøroyri, til Hvalba, og so allan vegin til Sumbiar, og aftur á Vág.

Longu í Øravík slapp Jákup Petur frá Hilmar Hansen, og sluppu teir báðir frá hinum súkklarunum í Trongisvági.

Veðrið var ikki júst summarveður. Tað var vátt og tað var grátt, men lagið á súkklarunum gott.

Meðan Jákup Petur súkklaði undan Hilmar, so gjørdi Hilmar alt fyri at koyra undan Boga Gregersen, Casper Rosen, Andrass Joensen og Gunnar Dahl-Olsen, sum arbeiddu væl saman fyri at minka um munin upp til Hilmar. Kvartettin arbeiddi væl saman og tað styttist fram til Hilmar. Komnir til Sumba so var munurin bert 35 sekund. Men knáur var hann, og tá Andrass, Bogi og Gunnar vóru við Núpin ávegis á mál, tá góvu teir upp at fáa Hilmar aftur, og fóru í staðin at koyra móti hvør øðrum, og nú heldur at jagstra bronsu heiðursmerkið.

Bogi legði hart út við Núpin, meðan tað var Andrass sum setti ferðina upp tá umleiðis ein kilometur var eftir. Men góðar 300 metrar frá málinum fór Gunnar framvið Andrass og koyrdi nú tað hann var mentur, men Bogi var beint í hølunum, og tað styttist. Endin var at Gunnar gjørdist nummar trý, Bogi fekk 4. plássið, og Andrass gjørdist nummar 5.

Fýra kvinnur vóru við til 1. etapu. Tvær til 2. etapu, og síðan hevur Súsanna Skylv verið einsamøll kvinna. Gjøgnumførur hon í dag, finaludagin, so verður hon samlaður vinnari hjá kvinnum. Hon er sterk, og hon hevur fingið góðar tíðir allar dagarnar, hóast tað serliga var fyrsta dagin, at hon brillieraði, tá hon vann á flest øllum monnunum í 24 kilometur Einkultstartinum í 1. etapu.

Í dag verður koyrt úr Tjørnuvík til Havnar. Leiðin gongur gjøgnum Kaldbakstunnilin og síðan niðan á Háls í Havn, har málið er uttanfyri bygningin hjá Leif Mohr.

Komnir til Havnar skulu tvey finaluumfør koyrast áðrenn vinnarin verður funnin. Tá verður koyrt eftir Hoyvíksvegi, eftir Smyrilsvegi, eftir Staravegnum, og so aftur á Hoyvíksvegin.

Hetta kann kanska samanberast við at vinna kappróðurin á Ólavsøku ella grannauppgerðina millum HB og B36. Ella B68 og NSÍ.

Bestu kortini hevur Jákup Petur, sum aftur í gjár vann ein tryggan sigur, og sum samanlagt liggur á einum greiðum 1. plássi.

Onki er liðugt, fyrr enn alt er liðugt, segði ein kendur politikkari. Og so er. Fleiri droyma um at vinna í dag, og tað er ikki óhugsandi at Hilmar Hansen megnar at vinna.

Andrass liggur á einum samlaðum 3. plássi, og tað kann hugsast, at Gunnar nú leggur ætlanir um hvussu hann kann vinna frá Andrass, fyri at taka 3. plássið frá honum.

Andrass hevur staðið á sigurspallinum, men tað hevur Bogi Gregersen ikki. Bogi hevur ment seg sera nógv seinasta árið, og tað er tí ikki óhugsandi, at hann verður ein av trimum, ið skal traðka upp á sigurspallin, tá 5. og seinasti teinur av Leif Mohr Kring Føroyar verður koyrdur í dag.

Kappingin byrjar klokkan 13, og roknast kann við, at fremstu súkklararnir koyra framvið málið fyrstu ferð klokkan nakað eftir klokkan 14.15.

Úrslitið frá 4. etapu her.