Manchester City hevur stórar avbjóðingar

Enska meistaraliðið í fótbólti, Manchester City hevur bert vunnið ein dyst í november og desember. Harvið kundi liðið hjá Pep Guardiola halda jól á einum sjeynda plássi, sum er rættiliga óvanligt fyri liðið í nýggjari tíð.

2. jóladagur, sum á enskum eitur Boxing Day, er altíð ein stórur dagur í enskum fótbólti, og nú klokkan 12.30 byrjaði fyrsti dysturin, har Manchester City tekur ímóti Everton.

Og Guardiola hevur fingið fleiri avboð til dystin í dag.

Tveir av landsliðsliðsleikarunum, Kyle Walker og Jack Grealish, verða ikki við í dag. Walker er vorðin sjúkur, og Grealish dregur við ein skaða.

Jack Grealish legst harvið afturat langa listanum av City-leikarum, sum ikki kunnu spæla orsaka av skaða. Teir eru Oscar Bobb, Ruben Dias, Ederson, Matheus Nunes, John Stones og Rodri.

Men tað gevur pláss fyri øðrum á liðnum, og í dag verður niðurlendski verjuleikarin Nathan Ake við aftur eftir at hava verið burtur í eina tíð.

Hinir dystirnir í Premier League í dag:

Kl. 15:
Bournemouth – Crystal Palace
Chelsea – Fulham
Nescastle – Aston Villa
Nottingham Forest – Tottenham
Southampton – West Ham

Kl. 17.30:
Wolverhampton – Manchester United

Kl. 20:
Liverpool – Leicester City

Í morgin:
Kl. 19.30:
Brighton – Brentford

Kl. 20:
Arsenal – Ipswich

Støðan í løtuni er tann, at Liverpool liggur á odda við 39 stigu, Chelsea hevur 35, Arsenal 33, Nottingham Forest 31 og Bournemouth og Aston Villa hava 28 stig. Liverpool hevur enntá spælt ein dyst færri enn hini.