Maria Pálsdóttir Nólsoy á veg til bestu donsku deildina

Maria Pálsdóttir Nólsoy er ein av teimum heilt spennandi ungu føroysku hondbóltsspælarunum. Hon hevur gjørt vart við seg á besta liðnum hjá Neistanum, síðani hon bert var 16 ára gomul, og sterki spælskiparin hevur - umframt at hava skinið á ungdómslandsliðunum - spælt 11 A-landsdystir sambært Handballstatz.

Nú skiftir Maria úr barndómsfelagnum. Landsliðsspælarin skal royna seg í Danmark, og sambært fleiri góðum keldum hjá Portalinum er sáttmáli komin í lag við Horsens. 

Hetta er so at siga endaliga komið uppá pláss, og verður tað almannakunngjørt í vikuni - møguliga seinni í dag, mánadag. Tað mangla sum skilst bert ymiskir smálutir. Um hetta verður veruleiki, skal 19-ára gamla hoyvíkskvinnan framyvir umboða Horsens (HH Elite). Har er føroyski A-landsliðsvenjarin, Claus Mogensen venjari, og harvið fær hann veruliga høvuðsábyrgd av menningini hjá Mariu Nólsoy.

Maria Pálsdóttir Nólsoy hevur verið torfør at støðga seinastu árini. Í 2022-2023 skoraði spælskiparin, sum kann nógv ymiskt, beint yvir 200 mál í SMS-deildini (Savnsmynd: Sverri Egholm)

Claus Mogensen hevur verið føroyskur landsliðsvenjari í útvið eitt ár nú. Hann vann týðandi stig í gjár og fær næsta kappingarár ein "føroyskan brikk" at ráða yvir í Horsens: Bakspælaran Mariu Pálsdóttir Nólsoy (Savnsmynd: Sverri Egholm)

Felagið úr Horsens megnaði at endaliga tryggja sær framhaldandi pláss í Kvindeligaen í dramatiskum dysti í gjár. HH Elite og Bjerringbro spældu beinleiðis uppgerð um at sleppa undan play-off dysti móti liði úr næstbestu deildini. 

Bjerringbro var á odda við trimum málum í steðginum, og eina løtu í 2. hálvleiki var munurin 6-7 mál. Claus Mogensen og hansara lið megnaðu tó onkursvegna at koma aftur, og tað endaði við javnleiki. Vegna sigrar á Bjerringbro í innanhýsis dystum í ár endaði HH Elite frammanfyri og spælir harvið aftur í fremstu røð í Danmark í 2024/2025.

Hetta verður so eftir øllum døma við Mariu Pálsdóttir Nólsoy sum ein av møguleikunum í bakketuni. Ungi spælarin hevur víst sínar eyðsýndu dygdir í bláa Neista-búnanum og í landsliðsblusuni. Eftir summarsteðgin verður tað í gula búnanum hjá HH Elite.

Maria Pálsdóttir Nólsoy spældi ikki í FM-endaspælinum vegna brotnan fingur. Hetta ávirkaði veruliga Neistan, sum sjálvandi fer at sakna landsliðsspælaran (Savnsmynd: Sverri Egholm)

Maria og Bjørk Franksdóttir Joensen eru javngamlar og hava fylgt hvørjum øðrum í Neistanum og á landsliðnum. Sum skilst fer Bjørk eisini at spæla hondbólt í Danmark eftir summarferiuna - tað er tó ikki endaliga greitt hvar (Savnsmynd: Sverri Egholm)

Rakul Wardum og Ringkøbing vóru í sama bólki sum HH Elite í niðara endaspælinum. Hann vann Skanderborg, har Súna Krossteig Hansen fer at spæla eftir summarferiuna. Umframt tær spæla Jana Mittún (Viborg) og Pernille Brandenborg (København Håndbold) í bestu donsku deildini.

Harvið verður talið av føroyskum A-landsliðsspælarum, í einari av teimum heilt sterku deildunum sum er, í minsta lagi fimm eftir summarsteðgin. Hetta er ógvuliga jaligt, í mun til menningina og tað at EM-endaspælið nærkast. Sum skilst skiftir Bjørk Franksdóttir Joensen (Neistin) helst eisini til danskan hondbólt í summar.