Neistin og VÍF sum væntað í FM-hálvfinalunum

Nú er greitt, at FM-hálvfinalurnar í SMS-deildini síggja soleiðis út: 

Kyndil (1) - Neistin (4)
H71 (2) - VÍF (3)

Talið í klombrum er plássið, sum liðini endaðu í grundspælinum. Harvið vórðu tað sum væntað nummar trý og fýra sum endaðu í hálvfinalunum saman við teimum báðum, ið vunnu sær rættin gjøgnum grundspælið.

Stjørnan stríddist væl í Vestmanna og hekk væl í til stutt fyri steðgin. Men VÍF fekk trý tey seinastu málini í 1. hálvleiki. So var 18-14, meðan liðini hvíldu seg, og tá VÍF so byrjaði væl betri í 2. hálvleiki, so gjørdist ikki veruligur spenningur um útfallið aftur. Heimaliðið vann tá samanumkom 36-27.

Tað var heilt góður álopshondbóltur til tíðir, og Rannvá Olsen skaraði framúr - serliga við sínum tólv málum. Samanlagt skoraðu tær báðar hjá VÍF, sum skulu savnast við landsliðnum í morgin í sambandi við HM play-off dystirnar móti Litava, tjúgu mál: Fríða Nolsøe Olsen skoraði átta ferðir.

Rannvá Olsen í dysti móti Stjørnuni. 22-ára gamla vestmannakvinnan skoraði 12 ferðir í kvøld (Savnsmynd: Sverri Egholm)

Tað varð meira spenanndi á Hálsi, har StÍF var á vitjan. Tað var málfátækt fyri steðgin (10-8), men væl meira lív kom í dystin í 2. hálvleiki. 

Í løtum var Neistin á veg avstað, men hóast tað vóru fýra mál á muni, tá seks og ein hálvur minuttir vóru eftir, so gjørdist stríddist StÍF til tað seiansta. Útiliðið skoraði trý mál á rað: Toppskjúttin Josefine Dyring (12 mál) til 27-26, tá beint yvir tríggir minuttir vóru eftir.

So skoraði StÍF tó ikki aftur. Nestin stongdi, og Ró Reginsdóttir skoraði seinasta málið í dystinum. Neistin er nú aftur uttan Bjørk Franksdóttir Joensen (knæskaða), og tað verður ógvuliga torført í hálvfinalunum móti Kyndli. 

FM-fjórðingsfinalurnar í SMS-deildini
Leygardagin 5. apríl
VÍF - Stjørnan 36-27 (18-13)

Toppskjúttar: Rannvá Olsen 12 mál, Fríða Nolsøe Olsen 8 mál - Jancy Jógvansdóttir Poulsen 6 mál

Sí dómaraseðil úr Vestmanna her

Neistin - StÍF 28-26 (10-8)

Toppskjúttar: Josefine Dyring (StÍF) 12 mál, Silja Heðinsdóttir (Neistin) 8 mál, Emmy Ingibjørg Kass (StÍF) 7 mál, Brynja Høj 6 mál

Sí dómaraseðil úr Havn her

Í næstu viku er landsliðssteðgur. Hálvfinalurøðirnar byrja mitt í apríl.