Nýggj ljósskipan á Ovara vølli

Umstøðurnar at sparka fótbólt á ovara vølli í Gundadali í Havn er munandi batnaðar, nú nýggj ljósskipan er sett upp kring vøllin.

Heimasíðan hjá Tórshavnar kommunu skrivar, at ljósskipanin nú lýkur krøvini, sum Fótbóltssamband Føroya setur í vallarreglugerðini til ljósskipanir á vøllum til dystir í Betri-deildini.

Umsitingin hjá kommununi hevur saman við veitarum og ráðgevum arbeitt við, at tryggja, at ljósdálkingin til grannalagið verður avmarkað. Nýggja ljósskipanin lýkur tí EU-standardin DS/EN12193 fyri ljósdálking.

Ljósskipanin, útgerð og stýringsskipan til hesa, er veitt av donsku fyritøkuni NorthLED Aps. Uppsetingin av ljósskipanini, umframt annað elarbeiði, er veitt av Tummasi Eli Hansen el-innleggjara. MEST hevur veitt og tilevnað stálið.

Ráðgeving í sambandi við el-innleggingar og eftirkanningar av mastrum v.m. er gjørt av LBF, ráðgevandi verkfrøðingum. 

(Mynd: Tórshavnar kommuna)