Pernille Brandenborg toppskjútti tá Storhamar spældi seg í hálvfinaluna

Pernille Brandenborg  skiftir í summar til rumenska stórfelagið CSM Bucaresti, sum skjótt skal spæla Final Four í Champions League.

Áðrenn skal føroyski landsliðsliðskiparin royna at vinna norska meistaraheitið - og greipuna - við Storhamar.

Fyrsta stigið í endaspælinum er tikið við tveimum fjórðingsfinalusigrum á Fredrikstad.

Tann seinni kom í hús í gjárkvøldið, mánakvøldið, tá Storhamar vann 30-28 á útivølli. Støðan í steðginum var 14-9.

Pernille Brandenborg spældi ein góðan dyst, og profilurin varð toppskjútti í dystinum við seks málum.

Pernille Brandenborg, sum her fegnast við landsliðsliðfeløgunum undir HM-endaspælinum, kundi fegnast um ein sigur í Fredrikstad í gjár. Hesin tryggjaði Storhamar hálvfinaluplássið (Mynd: Sverri Egholm)

Í hálvfinaluni skal Storhamar spæla móti Hamar. Har verður spælt "best av trimum" ella "fyrst upp í tvey".

Fyrsta hálvfinalan hjá Pernille og teimum verður um eina viku, týsdagin 12. mars, á heimavølli.