Rakitic aftur til Sevilla

Støðan í Barcelona F.C. er alt annað enn góð. Tað er serliga Messi-støðan, ið setur dám í katalanska felagnum. Heilt stóra stjørnan vil burtur, og vil nýta ein klasul í sáttmálanum til at gera tað. Barcelona noktar at lata Messi fara, men í dag hevur felagið kunngjørt, at ein semja er funnin við Sevilla um ein keypsprís fyri Ivan Rakitic.

32-ára gamli miðvallarin kom úr júst Sevilla í 2014. Tað var beint eftir, at hann sum liðformaður hevði vunnið Europa League við felagnum úr Andalusia. Tá kostaði Rakitic Barcelona áleið 18 milliónir evrur.

Nú, 310 dystir og 35 mál seinni, fær Barcelona eina og eina hálva millión evru frá Sevilla í fyrstu syftu. Virðið á avtaluni kann tó verða áleið 10 milliónir evrur.

Kroatin vann La Liga og Copa del Rey fýra ferðir við Barcelona, umframt Chapmpions League finaluna í 2015, har Ivan Rakitic legði Barca á odda í 3-1 sigrinum á Juventus.

Kelda: Sky Sports og F.C. Barcelona