Rakul Wardum var tann besta

Jonava, Litava (Portalurin): Rakul Wardum hevði ikki nakað serliga gott kvøld við Tjarnir í fyrra dystinum, tá Føroyar annars vunnu stórt.

22-ára gamli málverjin "hevndi seg" tó í dag. Litava kom annars til nógv fleiri skot - og fríari skot - men nummar 88 pilkaði litavisku skjúttarnir í løtum.

Samanlagt er Rakul skrásett fyri 17 bjargingar á eurohandball.com, sum svarar til 36 prosent av skotunum hjá Litava, ið raktu málið.

Hetta er eitt høgt tal. Í roynd og veru hevði Ringkøbing-málverjin, sum er uppvaksin í Kyndli, helst eini 2-3 bjaringar fleiri, enn tølini vísa.

Rakul Wardum tók fleiri "frí skot" (Mynd: Sverri Egholm)

Summar bjargingar vóru rímiliga lættar, meðan tað eisini vóru fleirar stórbjaringar. Rakul Wardum átti tvær veruligar duppultbjargingar, og stóð hon í dag royndina við at standa ein heilan dyst.

Eisini setti málverjin væl í gongd í fleiri førum og skoraði eisini eitt mál í tómt mál.

Fyri avrikið varð Rakul uppiborið kosin dagins spælari hjá Føroyum í 30-29 tapinum. Føroyar vunnu við níggju málum samanlagt í hesum umfarinum og skulu til HM í november.

Sí eisini: Føroysku kvinnurnar skulu spæla HM-endaspæl í vetur

Rakul Wardum á veg yvir eftir heiðrinum sum besti spælari hjá Føroyum 

Her saman við Pernille Brandenborg (Myndir: Sverri Egholm) 

----------------------------------------------

Seinni HM røkkstøkkdysturin (Play-off)
Jonava, Litava - sunnudagin 13.04
Litava - Føroyar 30-29 (14-11) - Samanlagt: 65-56 til Føroyar

Dystargongdin:
5 min: 2-0
10 min: 5-4
15 min: 8-6
20 min: 11-7
25 min: 12-9
30 min: 14-11
35 min: 16-14
40 min: 16-19
45 min: 20-22
50 min: 24-24
55 min: 26-25
60 min: 30-29