Rói Berg Hansen heim til Neistan í fulltíðarstarv

Tað hevur ljóðað í eina tíð, og í kvøld er tað váttað, at Rói Berg Hansen í summar vendir heim til Neistan.

Tá verður vongurin 30-ára gamla, og hevur tá verið burtur frá barndómsfelagnum í níggju ár. Hetta tí at Ròi hevur roynt hondbóltseydnuna, umframt nomð sær útbúgving í Danmark.

Í løtuni spælir Rói Berg Hansen við Køge, sum liggur til uppflyting úr triðbestu donsku deildini. Hann er skrásettur fyri 50 A-landsdystir og var í EM-hópinum herfyri.

Sí part av skriv frá Neistanum niðanfyri:

Royndi og eldhugaði landsliðsspælarin er námsfrøðilesandi, og skal hann bæði spæla og vera ungdómsvenjari hjá børnum og ungdómum í Neistanum, staðfestir felagið í kvøld.

Eftir at hava spælt hondbólt uttanlands í nøkur ár, kemur Rói Berg Hansen heim aftur til Føroyar – til Neistan – at spælal

Rói Berg Hansen hevur verið partur av uppbyggingini av manslandsliðnum, sum júst hevur spælt EM í Oslo. Saman við øðrum góðum ungum monnum var hann partur av ungdómslandsliðnum, sum m.a. gjørdu vart við seg til U21-HM í Algeria í 2017. Síðani er tað blivið til tvey endaspøl fyri A-landslið – EM í Berlin í 2024 og síðani EM í Oslo í 2026.

Vinstri vongurin á landsliðnum, sum er uppvaksin hjá Neistanum, fór uttanlands at menna seg sum hondbóltsleikara eftir góðu úrslitini hjá U21-landsliðnum í Algeria. Fyrst til FIF, síðani til Høj Elite og í løtuni spælir hann í Køge.

Eftir summarfrítíðina kemur Rói heim til Neistan við skjáttuni fullari av góðum hondbóltsroyndum og førleikum. Umframt at vera yrkisleikari, lesur Rói eisini námsfrøði. Rói fer við sínum góðu hondbóltsevnum og námsfrøðiligu útbúgving at styrkja besta mansliðið hjá Neistanum, samstundis sum hann eisini leggur lunnar undir komandi ættarliðini hjá bæði kvinnum og monnum.

Neistin er millum størstu hondbóltsfeløg í landinum. 550 børn, ung og vaksin spæla hondbólt hjá felagnum. Harafturat er ein herur av venjarum, sjálvbodnum og onnur knýtt at felagnum. Hetta er ein stór ábyrgd, sum Neistin tekur í størsta álvara. Tí brynjar felagið seg til framtíðina og arbeiðir miðvíst fyri, at Neistin skal vera Føroya besta og fremsta hondbóltsumhvørvi.

Starvið hjá Róa er fulltíðarstarv og liður í hesi menningini og framtíðartrygging av Neistanum. Høvuðsuppgávurnar hjá Róa eru at vera styrkivenjari hjá ungdóminum, vera venjari hjá børnum og ungum umframt at spæla við besta mansliðnum.

Rói Berg Hansen í eyðkendum stíli í Høllini á Hálsi - har fer kviki maðurin aftur at verða síggja nógv skjótt (Mynd: Jens Kr. Vang)