Russiskir boksarar sleppa á altjóða stevnur

Nú sleppa nevaleikarar úr Russlandi og Hvítarusslandi aftur at luttaka í altjóða boksidystum.

Tað hevur altjóða sambandið fyri olympiska boksing (amatør-boksing), IBA, boðað frá í dag.

Forseti í IBA er russarin, Umar Kremlev, ið varð endurvaldur í september.

- IBA er av teirri sannføring, at politikkur ikki eigur at hava ávirkan á ítrótt. Tí eiga allir íðkarar at fáa somu møguleikar, skrivar sambandið í fráboðan í dag.

Altjóða olympiska nevndin, IOC, hevur fyrr eisini úttalað seg um, at tað ikki er rætt at útihýsa íðkarar úr Russlandi og Hvítarusslandi í altjóða kappingum.