Sävehof er í hálvfinaluni eftir longda leiktíð

Í fjør koppaði Sävehof, við einum Óla Mittún í hopla, júst Ystads í finalurøðini. Skjótt skulu svensku meistararnir og liðið, sum nú er meistarafavorittur hittast í hálvfinalunum. Hetta er greitt eftir fjórðu fjórðingsfinaluna hjá IK Sävehof í gjárkvøldið.

Tað hevur ikki verið eitt so gott ár hjá verandi meistarunum, men nú er føroyingafelagið sloppið framvið fyrstu forðingini í endaspælinum.

Karlskrona vann fjórðingsfinalu nummar tvey, sum var í Partille. Men útisigrarnir hjá Sävehof setti liðið í góða støðu undan dystinum í gjár.

Hann var ógvuliga javnur. Tað var 12-11 í steðginum, men útiliðið var nakrar ferðir á sigurskós móti endanum. Tað eydnaðist tó teimum í gulum og svørtum at javna, og so varð farið í longda leiktíð.

Teir tíggju minuttirnar var IK Sävehof væl stinnari og vann tíðarskeiðið 6-3. Harvið 33-30 samanlagt, og tá tað er fyrst upp í tríggjar sigrar í hesum røðunum í svenska endaspælinum so varð ikki neyðugt við einari fimtu fjórðingsfinalu hjá Óla Mittún, Ísak Vedelsbøl og teimum.

Óli gekk á odda í gjár. Hann skoraði seks mál og legði upp til fleiri. 19-ára gamli føroyingurin hevði høgt "MEP"-tal.

Ísak Vedelsbøl skoraði uppá tað skotið, sum hann hevði. Strikuspælarin gjørdi eisini sítt í verjuni, og skal Ísak skjótt spæla sína fyrstu SM-hálvfinalu.

Ísak Vedelsbøl er í gongd við sítt fyrsta kappingarár í Svøríki (Savnsmynd: Sverri Egholm)

Tað verður ein stórur biti hjá liðnum úr Partille at gloypa. Ystads vann greitt grundspælið og síðani sína fjórðingsfinalurøð 3-0 móti Róa Ellefsen á Skipagtøu og Hallby.

Fyrsta hálvfinalan millum liðini verður spæld hósdagin 10. apríl. Har er tað eisini fyrst upp í tríggjar sigrar.