Silver League: Kvinnurnar leggja fyri í Lettlandi í morgin

Fyrstu landsdystirnir í sonevndu Silvurliguni verða longu í Letlandi um vikuskiftið. Føroysku kvinnurnar komu til Lettlands fyrr í vikuni við nýggjum italskum venjara og spæla fyrra dystin har fríggjadagin - í morgin - klokkan 17. 

Leygardagin er Ísrael á skránni, og næsta vikuskifti spæla Føroyar á heimavølli. Her verður talan um tríggjar Silver League-dystir á Sandi.

Seinasta umfarið hjá kvinnum er vikuna aftaná, og tá er eisini fyrsta umfar hjá monnum.

Bæði A-landsliðini í Kollafirði (Mynd: Flogbóltssamband Føroya)

Bæði A-landsliðini hjá Føroyum spæla trý umfør og samanlagt sjey umfør. Kvinnurnar skulu spæla í Lettlandi, Føroyum og Luksemborg, og menninir spæla í Íslandi, Føroyum og Georgia.

Liðini hava fyrireikað seg seinastu vikurnar - síðani landskappingin í Føroyum og tann í Danmark var av. Allir dystirnir hjá Føroyum verða væntandi at síggja á www.eurovolley.tv, upplýsir FBF.

----------------------------------------------------