Fótbóltur

So gekk ikki meira hjá HB

NSÍ støðgaði ósigraðu røðini hjá oddaliðnum og skapti meira spenning í oddastríðið við at vinna púra uppibornan 2-0 sigur við Løkin í kvøld. NSÍ er nú bert tvey stig aftanfyri HB.

Petur Knudsen og NSÍ vóru omaná móti Jógvan Róa Davidsen, ið var aftur við frá byrjan hjá HB (Mynd: Sverri Egholm)

Petur Knudsen og NSÍ vóru omaná móti Jógvan Róa Davidsen, ið var aftur við frá byrjan hjá HB (Mynd: Sverri Egholm)

2020-06-23 00:56 Author image
Agnar Prestá
placeholder

Lagt var upp til spennandi oddauppgerð, tá NSÍ tók ímóti HB í kvøld. Í fyrra hálvleiki var tó rímiliga stórur munur á liðunum. Hóast HB hevði bóltin nakað meira, var NSÍ greitt omaná, og tað var als ikki óuppiborið, at tað var 2-0 í hálvleikinum. Heimaliðið kundi tó verið á odda við fleiri málum, tí teir í gulum og svørtum skapti nógvar vandamiklar støður, og m.a hevði Klæmint Andrasson Olsen ein risamøguleikar, ein ið liðformaðurin onkursvegna stýrdi á yvirleggjaran og ikki í málið, umframt aðrar møguleikar.

Myndir: NSÍ - HB

Klæmint hevði tó fleiri góðar atgerðir og vann brotssparkið ið gav 2-0 málið, tá 16-ára Samuel Chukwudi varð noyddur at trýsta metmálskjúttan niður, so hann ikki skoraði. Hetta var eftir, at ein sera eyðsýndur Petur Knudsen hevði sett Bartal Wardum av í vinstru í einari umstilling. Petur var ísakaldur úr ellivu metrum og sendi Teit Matras Gestsson skeivan vegin. Nummar 16 var eisini íblandaður í 1-0 málinum ein hálvan tíma frammanundan. Jann Benjaminsen, ið spældi frálíka væl á vinstra vongbakki, fann Petur í brotsteignum, Bartal og hinir í HB-verjuni vóru ov passivir, Petur slapp at venda og finna Bárð Hansen, ið setti bóltin væl inn við vinstra beinið.

[object Object]
Petur Reinert var ivaleysur (Mynd: Sverri Egholm)

[object Object]
Samuel vann nógvar nærdystir móti Klæminti, men ikki hendan (Mynd: Sverri Egholm)

[object Object]

Petur Knudsen var tryggur, og so kundi teir á heimaliðnum fengast (Mynd: Sverri Egholm)

[object Object]

Bárður Hansen var eisini eyðsýndur og skoraði fyri NSÍ (Mynd: Sverri Egholm)

HB hevði lítið at bjóða uppá fyri steðgin, og oddaliðið fekk als ikki spælið at hanga saman. Ein langskotsroynd frá Daniel Johansen var tann besta hjá útiliðnum í 1. hálvleiki. Liðið hjá Jens Berthel Askou var uttan miðverjarnar Delphin Tshiembe og Heðin Hansen, umframt Adrian Justinussen og hinar ið eru úti í longri tíð. Pætur Petersen noyddist eisini út við skaða í 1. hálvleiki, og leikararnir tyktust heldur moyrir í løtum. 

[object Object]
Mads Mikkelsen fekk víst sínar dygdir, tá hann kom á vøllin í 2. hálvleiki (Mynd: Sverri Egholm)

[object Object]

Men tað var ikki nógv at fegnast um hjá Jens Berthel Askou og hansara monnum (Mynd: Sverri Egholm)

Breiddin á HB-liðnum manglar í løtuni, men nýggi maðurin gjørdi mun tá hann kom inn í 2. hálvleiki. Mads Mikkelsen vísti góðar taktir við bóltinum, og HB kom eisini til nakrar góðar møguleikar. Tveir teir størstu møguleikarnir fekk danin Mathias Nygaard, ið kom væl inn í brotsteigin og stútaði, men Tórður Thomsen bjargaði sera væl - serliga í fyrra førinum. 34-ára gamli málverjin hevur spælt frálíka væl seinastu dystirnar, og NSÍ hevur bert latið fýra mál inn í ár, og tað er klárt lægsta talið í Betrideildini. HB hevur latið átta mál inn, og tað er næst á listanum.

[object Object]
Tórður Thomsen er í gongd við eitt frálímt kappingarár - hann forðaði Mathiasi Nygaard tvær ferðir í kvøld (Mynd: Sverri Egholm)

[object Object]
Betuel Hansen stríddist sera hart og væl á miðvøllinum (Mynd: Sverri Egholm)

[object Object]
Samstarvið hjá Jann Benjamonsen og Petur Knudsen í vinstru, gjørdi tað sera trupult fyri Jógvan Róa Davidsen og HB-verjupartin sum heild (Mynd: Sverri Egholm)

Í 2. hálvleiki hugsavnaðu teir á heimaliðnum seg mest um at verja, og hetta eydnaðist væl. NSÍ-leikararnir stríddust sera væl, og heimasigurin var fult uppiborin. NSÍ hevur seinastu vikurnar fingið 1-1 javnleik í Klaksvík og í Gundadali móti B36 í dystum, har liðið hjá Glenn Ståhl hevur verið greitt við undirlutan í spælinum, og hvat málmøguleikum viðvíkur. Í kvøld var tó øðrvísi, og nú eru bert tvey stig, ið skilja NSÍ og HB, og oddastríðið er vorðið meira tætt, nú teir í svørtum og reyðum ikki longur eru ósigraðir. Komandi umførini, undan stutta summarsteðginum, hava NSÍ og HB bert uppgávur móti liðum úr niðaru hálvu av stigatalvuni á skránni. 

Betrideildin 9. umfar
23.06
NSÍ - HB 2-0 (2-0)
11' Bárður Jógvanson Hansen (Petur Knudsen)
41' Petur Knudsen (br. - Klæmint Andrasson Olsen)

Sí eisini: 
Troest: Vóru væl fyrireikaðir
Teitur Gestsson: Slett ikki gott nokk


NSÍ (5-2-3/3-4-3): Tórður Thomsen - Bárður Jógvanson Hansen (82' Pætur Hentze), Jóhan Troest Davidsen, Oddur Árnason Højgaard, Rógvi Egilstoft, Jann Julin Benjaminsen - Mórits Heini Mortensen (63' Salmundur Bech), Betuel Hansen - Búi Egilsson ('74 Aron Knudsen) - Klæmint Andrasson Olsen, Petur Knudsen 

HB (4-3-3): Teitur Matras Gestsson - Jógvan Rói Davidsen (L), Bartal Wardum, Samuel Johansen Chukwudi, Daniel Johansen - Mathias Nygaard, Mikkel Frankoch, Dan í Soylu (62' Mads Boe Mikkelsen) - René Shaki Joensen (77' Kevin Schindler), Øssur Dalbúð, Pætur Petersen (36' Heri Hjalt Mohr)

Støðan: 
1. HB (22 stig) 
2. NSÍ (20 stig) 
3. KÍ (20 stig)
4. B36 (19 stig) 
5. Víkingur (14 stig) 
6. ÍF (13 stig)
7. EB/Streymur (7 stig) 
9. TB (6 stig)
8. AB (4 stig) 
10. Skála (1 stig)

Í gjár: 

EB/Streymur - Víkingur 0-2 (0-0)
84' Ari Olsen 0-1
89' Jákup Johansen 0-2

Myndir: EB/Streymur - Víkingur

KÍ - Skála 3-0 (2-0)
9' Jákup Biskopstø Andreasen 1-0
41' Patrik Johannesen 2-0
46' Páll Klettskarð 3-0

ÍF - B36 0-3 (0-1)
39' Sebastian Pingel 0-1
84' Brian Jakobsen  0-2
90' Meinhard E. Olsen 0-3

Myndir: ÍF - B36

TB - AB 1-1 (1-1)
15' Nikolei Johannesen 1-0
38' Sjálvmál

placeholder
placeholder