Spæla í B36 klæðum í Uganda

Tað er vorið alsamt meira vanligt, at gomul og brúkt klæði hjá føroyskum fótbóltsfeløgum enda í londum, har fyritreytirnar ikki eru heilt tær somu sum í Føroyum .

B36 er eitt av feløgunum, sum letur. Seinastu tvey árini eru spæliklæði farin til Zambia og Kenja.

Hesaferð var talan um eitt annað afrikanskt land. Ronnie Thomassen tók fleiri sett av brúktu B36-klæðum við sær á ein skúla í Kampala í Uganda.

Pláss var ikki fyri øllum í viðførinum ta ferðina, men nú er alt komið fram, skrivar B36. 

- Fótbóltsliðið á skúlanum, sum fyrr hevur fingið blusurnar, eigur sostatt nú fleiri sett av B36 klæðum. Úr Kampala verður sagt, at børnini vóru sera glað og takksom.

Børnini fegnast um klæðini úr Føroyum. Talan er um Adidas-klæði. B36 skifti frá hesum klædmaerkinum til Joma fyri tveimum árum síðani.