Ståle móti Solskjær í Köln

Mikukvøldið vann FCK sannførandi 3-0 á turkiska meistaraliðnum, Istanbul Basaksehir, í tómu Parkini. Harvið fór danska høvuðstaðarfelagið víðari. Seinni sama kvøld gjørdi United arbeiði liðugt móti Linz (7-1 samanlagt), og í kvøld bresta liðini hjá norðmonnunum Ståle Solbakken og Ole Gunnar Solskjær saman.

Les eisini: FCK og Manchester United hittast í fjórðingsfinaluni

Teir hava verið liðfelagar á norska landsliðnum. Nú skal Ståle royna at fremja bragdið við FCK, sum ongantíð er komið so langt í einari evropeiskari kapping. Fyrimunurin hjá leyvunum er, at talan er um ein einstakan dyst á uttanveltaðum vølli - á RheinEnergieStadion í  Köln. Ståle Solbakken fór í 2011 úr FCK til júst FC  Köln, men uppihaldið sum venjari har vardi ikki leingi. 

52-ára gamli Solbaken undir dystinum móti Basaksehir (Mynd: EPA)


Landsmaðurin, Ole Gunnar Solskjær, hevur havt nógva viðgongd síðani februar (Mynd: EPA) 

Ein sigur til FCK gevur hjá fleiri veddingarfyritøkum pengarnar 15 ferðir ella fleiri aftur, og danska felagið er tað av teimum átta, ið eru eftir, sum sambært veddingarfyritøkum hevur greitt minst møguleika at vinna Europa League.

Manchester United er størsti favoritturin at vinna kappinga í løtuni, og í stórfelagunum hungra teir eftir fyrsta steypinum í trý ár. Tá var tað júst Europa League-steypið, sum kom í hús.

Tað vóru serliga Jonas Wind og Rasmus Falk, ið vóru í hopla í Parkini mikukvøldið, men hendan uppgávan verður nakað størri (Mynd: EPA)

Bruno Fernandes er toppskjútti í Europa League - hann hevur skorað fimm av seks málunum við Sporting, men hevur samlað gjørt stóran mun fyri United síðani skiftið í januar (Mynd: EPA)

Inter er tað liðið, ið aftaná United verður mett, at hava best møguleika at vinna kappingina. Í kvøld spælir liðið hjá Conte í Düsseldorf móti Leverkusen, ið harvið ikki skal úr landinum fyri at spæla á uttanveltaðum vølli. Talan kann gerast um ein sera spennandi dyst.

Báðir dystirnir byrja klokkan 20.00 og skulu avgerast í kvøld.