Strandingar javnaðu í evstu løtu

Føroyameistararnir úr H71 hava ikki havt eina góða byrjan uppá kappingarárið. Nógvir av stóru profilunum eru farnir uttanlands at royna eydnuna, og tað sæst aftur. Grundspælið í Burn deildini byrjaði síðsta vikuskiftið, og tá vunnu vestmenningar 27-28 á H71. 

Í dag vóru hoyvíkingar á vitjan hjá StÍF á Skála og hóast tað stóran part av dystinum bendi á ein sigur, javnaðu strandingar í evstu løtu. 

Støðan var 11-15 tá liðini fóru til hálvleiks. Hoyvíkingar førdu allan dystin, og vóru eitt skifti í seinna hálvleiki á odda við sjey málum.

Strandingar komu aftur í dystinum, og fingu í seinasta minutti møguleika at javna. Tá sjey sekund vóru eftir kundi StÍF fara í álop fyri at javna, og tað gjørdu teir eisini. Martin Danielsen skoraði í allar seinasta sekundið í dystinum til úrslitið 26-26.

Ein annar dystur varð leiktur í bestu hondbóltsdeildini hjá monnum. Kollfirðingar vóru á vitjan í Vestmanna. VÍF var á odda 16-9 í steðginum og vann dystin 31-23.

Úrslit í dag

StÍF - H71 26-26 (11-15)
VÍF - KÍF 31-23 (16-9)

Støðan Burn deildin

1. VÍF 4 stig (2 dystir)
2. Team Klaksvík 2 stig (1 dyst)
3. Neistin 2 stig (1 dyst)
4. KÍF 2 stig (2 dystir)
5. StíF 2 stig (2 dystir)
6. H71 1 stig (2 dystir)
7. Kyndil 0 stig (2 dystir)

Komandi dystir í Burn deildini

Leygardagin kl. 16: StÍF - VÍF í høllini á Skála
Sunnudagin kl. 16: H71 - Neistin í Hoyvíkshøllini
Sunnudagin kl. 17: Team Klaksvík - Kyndil í Badmintonhøllini