Tveir klaksvíkingar hava skrivað undir á Skála

Skála fekk í gjárkvøldið tveir leikarasáttmála uppá pláss afturat. Talan var um tveir heilt ymiskar miðvallarar, ið báðir eru uppvaksnir í KÍ. 

Greitt er nú, at Heðin Klakstein fer undir sítt triðja kappingarár á Skála. Hann kom til felagið í 2018, stutt eftir at pápi hansara, Eyðun Klakstein, hevði tikið við. Nú er Eyðun í Víkingi - Heðin heldur fram á Skála. Álopskendi miðvallarin hevur áður verið kosin til ársins leikara í KÍ, og hevur sambært FaroeSoccer samanlagt spælt 168 dystir í Betrideildini síðani 2012. Seinastu tvey árini hevur Heðin spælt 55 dystir í lands- og steypakappini við Skála og skorað seks mál.


Formaðurin í Skála, Rógvi Reinert Djurhuus, saman vaið nýggja leikaranum, Jóhan Waag Høgnesen (Mynd: Skála ÍF)

Jóhan Waag Høgnesen var nøkur ár í Sønderjyske, har hann var partur av ungdómsakademiinum. Annars hevur Jóhan altíð leikt við KÍ. Nú er hann 21 ár og roynir nýggjar leiðir. Síðani hann kom aftur til Klaksvíkar, hevur Jóhan Waag Høgnesen spælt fast í 1. deild: 60 dystir, 9 mál, tvær bronsur og eitt gullheiðursmerki er tað vorðið til. Hann fekk tvey sein innhopp í Betrideildini - bæði í heimadystum móti AB - í 2018. Nú skal hartarbeiðandi og kviki miðvallarin, ið eisini kann spæla bakkur, royna seg meira í fremstu røð.