Video: Lamhauge, Hoseth og Pingel kós móti uppflyting eftir stórsigur

Í løtuni er eingin føroyingur í fremstu norsku deildini, men við stórsigri mikukvøldið liggur Strømgodset til uppflyting, nú fýra umfør eru eftir í næstbestu norsku deildini.

Mattias Lamhauge er fyrsta val á føroyska A-landsliðnum og hevur verið fyrsta val í Strømgodset, síðani felagið keypti hann úr Fredericia - til býin har havnarmaðurin búði eitt skifti sum barn.

Mattias Lamhauge og Gunnar Vatnhamar undir landsliðvenjing á Tórsvølli fyrr í mánaðinum. Teir báðir spældu allar 360 minuttirnar fyri Føroyar í vindeyganum (Mynd: Sverri Egholm)

Í gjár var føroyingurin tryggur millum stengurnar, tá Kongsvinger vitjaði í Drammen. Gamla liðið hjá Julian Johnsson fekk gamaní eitt mál, men tað var við brotssparki, tá støðan longu var 5-0.

Strømgodset spældi ógvuliga væl og hevði fult tamarhald á í lykladystinum. Undan honum var Kongsvinger á 2. plássi, sum er annað beinleiðis uppflytingarplássi, og hevði tvey stig niður til Strømgodset. Men nú liggja Mattias Lamhauge og teir á 2. plássi í OBOS-deildini.

Tvey stig eru upp til oddaliðið Haugesund, sum vitjar til oddabrak leygardagin.

Fleiri gamlir kenningar í føroyskum fótbólti eru í Strømgodset. Magne Hoseth, fyrrverandi KÍ og B36, er høvuðsvenjari, og Sebastian Pingel er toppskjútti hjá liðnum.

Fyrrverandi áleyparin hjá B36 og HB gjørdi av álvara bart í 5-1 sigrinum í gjár. Danin skoraði hattrik  og hevur nú 18 mál í kappingarárinum