VÍF-kvinnur fáa danskan venjara og grønlendskan styrk

Vestmanna Ítróttafelag hevur fingið nýggjan venjara til besta kvinnuliðið. Eisini er ein grønlendskur landsliðsspælari komin til felagið.

Venjarin eitur John Larsen. Hann er 42 ár, kemur úr Kolding í Danmark ,og hevur drúgvar royndir sum venjari í Danmark og Noregi. Nýggi venjarin kemur fyrst og fremst at taka sær av besta kvinnuliðnum, men fer eisini at hjálpa til við venjing og menning av yngru spælarunum og venjarunum í felagnum.

Avtalan við John er fyri restina av hesum kappingarárinum og um partarnir báðir verða nøgdir við samstarvið, verður miðjað eftir at leingja avtaluna, skrivar heimasíðan hjá VÍF. Dia Midjord var í summar settur venjari í felagnum, men samstarvið endaði fyrst í desember, og síðan hava Ingi Olsen og Agnar Joensen fyribils tikið sær av venjingini.

Kvinnuliðið hjá VÍF hevur samstundis fingið ein nýggjan spælara í hópin. Hon eitur Ivâna Meincke, er 24 ár og kemur úr felagnum GSS í Nuuk, Grønlandi. Ivâna er striku- og verjuspælari við royndum frá grønlendska landsliðnum.

Meðan landskappingin hjá monnunum heldur frí orsaka av landsdystum í Luksemburg, verður fult umfar í kvinnudeildini hetta vikuskifti. VÍF skal sunnudagin taka ímóti H71 í høllini í Vestmanna. 

Ivâna Meincke