- Mótstøðan kemur at minna um Hibernian

Klokkan 09.50 setti eitt flogfar seg úr Vágunum við kós móti Aberdeen. Umborð eru teir úr NSÍ, sum um eina løtu koma til triðstørsta býin í Skotlandi. Har bíðar ein stór uppgáva í 1. umfari í Europa League - ímóti liðnum sum endaði nummar fýra í Skotlandi í fjør, sum seinastu seks árini hevur luttikð í Europa League, og sum fimm av teimum hevur spælt víðari til 3. umfar.

- Nú hittu vit Hibernian fyri tveimum árum síðani, og mótstøðan kemur helst at minna nógv um ta, vit møttu tá. 

Soleiðis sigur Bárður Jógvansson Hansen um uppgávuna. Í 2018 tapti NSÍ heili 6-1 í Edinburgh (spældi tó í undirtali í beint yvir ein tíma), og á Svangaskarði endaði tað 4-6, har Klæmint Andrasson Olsen gjørdi hattrikk.  

Hvat skal NSÍ so gera betri, enn tá liðið seinast var í Skotlandi og fyri at hava nakran møguleika fyri at spæla seg viðari?

- Fyrst og fremst snýr tað um at halda teimum frá so nógvum møguleikum sum gjørligt. Eydnast tað, so vita vit, at vit altíð megna at skapa nakrar málmøguleikar.

- Lagið er gott, sjálvsálitið er høgt, og menn eru spentir til uppgávuna (Mynd: Sverri Egholm)

Farna hóskvøld vann NSÍ heili 5-1 á Barry Town United. Tað var fyrstu ferð, at felagið spældi seg víðari í evropeiskum fótbólti. Hóast mótstøðan ikki var tann sterkasta, so gav sigurin sjálvsálit, og nú eru teir svangir og spentir uppá meira, sigur Bárður Hansen:

- Fyrireikingarnir minna nógv um tær, sum vóru til seinasta dyst hjá okkum á Svangaskarði. Lagið er gott, sjálvsálitið er høgt, og menn eru spentir til uppgávuna. Úrslitið á Toftum vísir, at alt ber til. Vit fara ikki til Aberdeen til sightseeing men fyri at koma víðari

28-ára gamli Bárður Jógvansson Hansen er í gongd við sítt fjórða kappingarár í NSÍ. Hann hevur havt eitt sera gott kappingarár sum høgri vongbakkur, men hevur spælt lítið seinastu tveir mánaðirnar. Í dystinum á Svangaskarði í seinastu viku, noyddist hann út eftir ein tíma, men hóast støðan viðvíkjandi knøunum ikki er so góð, so spælir Bárður fyri NSÍ í Aberdeen í morgin:

- Knøini hava sæð betri dagar. Eg havi spælt uppá sproyjtur nú í tvey ár, men í vetur farið eg undir skurð í báðum knøunum. Talan er um eitt slag av kroniskum bruna í báðum sinunum í knøunum. Men eg ætli at spæla hósdagin.

Fyrsta bríksl í annaðkvøld verður klokkan 19.45. Dysturin kann síggjast ókeypis hjá Televarpinum