- Vit skulu vinna 4 ella 5-0 móti Føroyum

U21-liðini hjá Føroyum og Danmark eru komin á vøllin til EM-undankappingardystin í Aalborg. 

Danmark er risafavorittur, og við einum sigri spæla danir seg til EM-endaspælið, ið verður í Italia og San Marino komandi summar.

Dysturin verður vístur á Kanal 5, og fyri løtu síðani var upptakt, har fyrrverandi landsliðsleikararnir, Lars Jacobsen og Flemming Povlsen, m.a. komu til orðanna. Flemming Povlsen var ivaleysur: Danmark skuldi blása føroyingarnir um koll og vinna greitt.

Spurdur um tað ikki gav nakað av virðing fyri liðnum, at Føroyar høvdu spælt javnt tvær ferðir ímóti Póllandi, ið er eitt stig aftanfyri Danmark og sum fekk javnt har fríggjadagin, svaraði Povslen noktandi. Hann vísti á, at góðskan á danska liðnum var so høg í mun til á tí føroysku liðnum, at tað eigur at síggjast á vøllinum í kvøld.

Lars Jacobsen var meira varin, men trý stig er sjálvsagt eitt krav til danska liðið, ið er mannað við spennandi leikarum. Ein stórur profilur er tó ikki tøkur; miðvallarin Philip Billing úr Huddersfield. Danir vunnu 3-0 á Tórsvølli í fjør, har sigurin kundi og budi verið størri.

Flemming Povlsen vann EM í 1992 saman við millum annað Lars Olsen. Fyrsta bríksl í Aalborg er nú klokkan 17.00

Føroyska liðið (4-3-3):Karstin Hansen – Ari Olsen, Bjarni Petersen, Ólavur Niclassen, Jóannes K. Danielsen – Betuel Hansen(L), Jóannes Bjartalíð, Jákup B. Andreasen – Benjamin Heinesen, Jákup L. Thomsen, Meinhard E. Olsen