Fótbóltur

AB hevur fingið nýggjan vongspælara úr Finnlandi

20-ára gamli Jacob Gottberg er vinstrabeintur og hevur royndir úr næstbestu finsku deildini. At hann kemur í hópin, ið næstan er endaligur, nú, kemst millum annað av skaðastøðuni hjá Mariusi Kryger Lindh.

Talan er um ein spælara, sum avgjørt ikki er bangin fyri at bjóða av, skrivar AB millum annað um nýggja spælaran, sum er skrásettur fyri 36 dystir í næstbestu finsku deildini (Mynd: argjaboltfelag.com)

2023-02-19 16:25

Agnar Prestá

Betrideildarhópurin hjá AB fyri 2023 nærkast sínum endaliga skapi. Hetta skrivaði Argja Bóltfelag á heimasíðu sínari í gjár, í samband við at Jacob Gottberg úr Finnlandi varð kunngjørdur sum nýggjur í felagnum.

Talan er um 20-ára gamlan vinstrabeintan vong, sum hevur spælt yvir 30 dystir í næstbestu finsku deildini. Seinnu hálvu av 2021 royndi Jacob Gottberg seg eisini í svenskum fótbólti.

Tað at hann kemur inn í hópin nú, hongur saman við at AB hevur mist onkrar av álopskendu leikarunum frá 2023, og at danski profilurin Marius Kryger Lindh, ið bert spældi tveir dystir í seinasta triðingi í fjør, framhaldandi er darvaður av skaða

- Við frágongdini í vetur og skaðastøðuni hjá Mariusi Kryger Lindh í huga hevur tað verið eitt ynski hjá venjara okkara, Henrik Larsen, at fáa ein nýggjan vongspælara til hópin, og hesin styrkurin er nú funnin í Jacobi Gottberg, skrivar ab.fo.

Finnin var fyri fyrstu ferð at síggja í AB-blusuni í venjingardysti ímóti B71 í gjár. AB vann dystin 2-1 - Ragnar Skála skoraði bæði málini.

- Til tíðir vísti Jacob glottar við sínum kvikleika og góða vinstra beini. Talan er um ein spælara, sum avgjørt ikki er bangin fyri at bjóða av.

Sáttmálin millum AB og unga finnan er galdandi fyri kappingarárið 2023. AB endaði í fjør nummar átta í Betrideildini við 29 stigum.

Vinarliga broyt tínar kennifíla - og privatlívsstillingar fyri at síggja hetta innihald