EBS/Skála tevjar aftur gull

Lagt var upp til satt oddabrak á Skála í kvøld, tá EBS/Skála og KÍ, jøvn í stigum, brustu saman. Tað gjørdist eisini javnt og spennandi, men tað endaði við tí, sum er við at gerast ein vani í føroyskum kvinnufótbólti: EBS/Skála drólongra stráðið

Tað leikaði javnt á og var málleyst fram til miðskeiðis í 2. hálvleiki, tá Margunn Lindholm avgjørdi dystin fyri heimaliðið við einum frálíkum langskoti. Miðvallarin, ið eisini avgjørdi steypafinaluna við einari perlu, smekkaði bóltin upp í málhornið úr stórum 25 metrum.

(Mynd: Sverri Egholm)

KÍ royndi at svara aftur og kom eisini til nakrar upplagdar møguleikar at javna. Men effektiviteturin manglaði, og tá bríkslað var fyri seinastu ferð, var stór frøi á EBS/Skála-liðnum og heimákoðarum. Tey vita, at FM er sera tætt við at vera heima. KÍ misti sín møguleika at taka FM-heitið aftur.


(Mynd: Sverri Egholm)

Í Sarpugerði var málveistla, tá HB vann 5-3 á ÍF/Víkingi. HB hevur harvið framvegis ein matematiskan møguleika í FM-stríðnum, men tað skal ein sigur til í Klaksvík leygardagin, samstundis sum EBS/Skála tapir fyri B68, ið er á aftasta plássi. Fýra mál skulu eisini innheintast.

Harvið er enn eitt meistaraheiti og steyp nær við hjá EBS/Skála.

19.umfar:

EBS/Skála - KÍ 1-0 (0-0)

ÍF/Víkingur - HB 3-5 (1-3)

B36 - B68 (byrjaði klokkan 19.30)

1		EBS/Skála	19	15	2	2	73	14	+59	47
2		HB	19	14	2	3	75	20	+55	44
3		KÍ	19	14	2	3	56	18	+38	44
4		ÍF/Víkingur	19	6	0	13	29	58	-29	18
5		B36	18	1	2	15	11	72	-61	5
6		B68	18	1	2	15	17	79	-62	5

(Talva: FaroeSoccer)