Ein ávís ónøgd í Gundadali

Fyrsti dystur í 3. umfari varð spældur í Gundadali. HB og Víkingur høvdu framskundað dystin til flaggdagin og vóru rímiliga nógv fólk møtt upp í kuldanum - veðrið var gott at spæla fótbólt.

Tað var Víkingur, sum var omaná frá byrjan. Útiliðið var í somu manning sum í steypadystinum í Sarpugerði fríggjakvøldið, og kom við nøkrum av somu tingunum sum teir úr Eysturkommunu vístu tá.

Víkingur tyktiskt at vera fysiskt omaná tað mesta av dystinum og átti at lagt seg á odda. Serliga tá Martin Klein varð spældur fríur eftir frálíkt álop, og tá Geza Turi var púra fríur við aftaru stong í samband við deyðbóltsstøðu. Í fyrra førinum rakti áleyparin ikki bóltin, og í seinnu støðuni fluktaði Geza mitt á Teit Gestsson.

HB hevði tó ein stóran møguleika tíðiliga. Tað var, tá hálvskaddi Mikkel Dahl í fríari støðu stútaði omanfyri. Seinastu løtuna av hálvleikinum tóku teir reyðsvørtu yvir. Teir spældu við toli, fingu trýst Víking aftur, fingu tað at flóta, og einaferð bjargaði útiliðið á strikuni. Tríggjar minuttir fyri steðgin sendi Viljormur Davidsen gótt innlegg til aftara øki, Áki Samuelsen tók bóltin hegnisliga niður, lyfti væl uppum Inga Johnardsson og síðani aftur uppum Bárð á Reynatrøð í málinum. Annað mál hjá hjá 19-ára gamla havnarmanninum móti HB uppá fimm dagar.

Áki Samuelsen legði HB á odda 1-0 og talan var um frálíkt og frekt mál (Mynd: Sverri Egholm)

Yvirvágin hjá heimaliðnum helt ikki fram eftir steðgin. Ístaðin koyrdi Víkingur á, fekk skapt støður og vunnið nógvar "næstu-bóltar" á HB-hálvuni. Heimaliðið kom undir eitt ávíst trýst fyrsta korterið ella so eftir steðgin, og tíggju minuttir inn í annan hálvleik javnaði Víkingur. Útiliðið fekk eitt hav av hornaspørkum og eisini fleiri fríspørk í góðum støðum gjøgnum dystin, og tað var miðverjin Bergur Gregersen, ið javnaði við góðum stútara eftir flott innlegg frá Olafi Bárðarsyni úr vinstru. Aftur skoraði ein miðverji hjá Víkingi eftir deyðbóltsstøðu móti HB.

Víkingur hevði eina rúgvu av deyðbóltsstøðum, og umframt at skora uppá ta eina gjørdist útiliðið vandamikið í nøkrum øðrum (Mynd: Sverri Egholm)

Jákup Thomsen kom inn fyri Mikkel Dahl, ið hevur trupulleikar við økslini. HB hevði ikki nógv at bjóða uppá eftir steðgin (Mynd: Sverri Egholm)

Restina av dystinum vóru ikki so upplagdir møguleikar, hóast bæði liðini høvdu støður og onkur fín skot - serliga í sambandi við deyðbóltar. Eingin tyktiskt heilt nøgdur við tað eina stigið eftir dystin, men liðini taka tað við.

HB er nærri KÍ nú men kann koma fýra stig afturum og verða yvirhálað av B36, um tey bæði vinna á ávíkavist EB/Streymi og B68 á útivølli í morgin. Um so er. økist frástøðan frá Víkingi og upp til topp-trý, í mun til hvat hon var áðrenn hetta umfarið. Jóhan Petur Poulsen og toymi kunnu í øllum førum fegnast um enn eitt heilstoypt avrik, og næstu dystirnir eru móti liðum, har Víkingur er favorittur.

*Ein dysti fleiri