Eliesar Olsen nýggjur venjari hjá B36-kvinnum

Eliesar Olsen verður høvuðsvenjari hjá besta kvinnuliðnum hjá B36 í 2025 og 2026.

B36 boðar frá, at sáttmáli var undirskrivaður í kvøld.

Eliesar Olsen er 35 ára gamal, men hevur longu drúgvar royndir sum venjari.

Seinastu árini hevur hann verið høvuðsungdómsvenjari í EB/Streymi. Bara 24 ára gamal flutti hann saman við barndómsfelagnum Skála upp í bestu deildina í 2013, har hann eisini fekk seg royndan árið eftir. Eliesar Olsen hevur eisini fyrr verið høvuðsungdómsvenjari á Skála.

B36 hevði eitt ungt lið í fjør, og megnaði ikki at vinna seg í topp fýra og í ovara endaspælið í Betrideildini.