Felagsliðið í Suðuroynni heldur allarhelst ikki fram

Felagsliðið TB/FCS/ROYN sær út til at fara í søguna. Tað er støðan eftir at TB hevur sent FC Suðuroy skriv um ynski at halda fram í samstarvinum.

Í skrivinum stendur, at TB setur sum treyt, at heimavøllurin hjá felagsliðinum skal verða við Stórá í Trongisvági, veit in.fo at siga. Og hetta er tað, sum sær út til at gerast mønustingurin fyri samstarvið.

FC Suðuroy metir, at hetta ikki er í tráð við treytirnar í samstarvinum, og tí skilir felagið hetta, sum um at samstarvið er endað.

Formaðurin í FC Suðuroy, Julius Vest Joensen, hevur í aftursvari takka fyri samstarvið.

Heldur hendan støðan sær, verður TB at síggja í Betrideildini, meðan FC Suðuroy spælir í triðju bestu deildini komandi kappingarár.