Fimti evropeiski dysturin á rað uttan KÍ-mál

Fyrri dysturin í einum røkkstøkkumfari er javnan av álvara sum ein fyrri hálvleikur, har man ikki loypir framav. Og tað var tað veruliga í Klaksvík í kvøld. Lettisku og føroysku meistararnir vóru varnir; serliga gestirnir.

Teir kundu annars lagt seg á odda tíðliga í 2. hálvleiki, tá Riga FC hevði sína bestu løtu í dystinum. Men Mark Jensen hevði eina stórbjarging, og sum heild var verjuparturin hjá KÍ góður í dag.

Eftir fimm mál inn á Tórsvølli fríggjakvøldið og trý á Argjum mánakvøldið, var neyðugt hjá KÍ at knýta fast, og tað eydnaðist - eisini uttan Deni Pavlovic sum var ov skaðadarvaður.

Men frameftir eru trupulleikar í Evropa í summar: Hetta var fimti dysturin á rað har uttan mál. 

Móti Lech Poznan vóru stóru møguleikarnir ikki gagnnýttir. Í dag skapti KÍ ikki serliga nógvar, men heilt fitt av støðum vóru.

Annars vanliga vandamiklu hornaspørkini hjá Árna Frederiksberg sótu ikki so ofta fyri steðgin, og tá tey gjørdu var Riga-spælari fyri. Men í 2. hálvleiki komu tveir teir størstu eftir horna - eitt úr hvørjari síðu. Fyrst var tað Gaston Tellechea, og seint í dystinum fekk innskifti Dávid Reynheim. Stútarin hjá unga áleyparanum sníkti seg tó á stongina, og so endaði 0-0.

Aftur í dag skifti Magnus Powell rímiliga seint út. KÍ'arnir stríddust væl men fingu ikki skapt nógv í opnum spæli: Eitt vælspælt álop í høgru síðu í fyrra hálvleiki, sum Hallur Hansson var nær við at beina í netið, var tað tættasta. Annars vantaði seinasta góðskan í fleiri støðum.

Men sum heild stóð KÍ einki aftanfyri Riga FC á degnum, og uppgerðin púra opin undan dystinum í lettiska høvuðsstaðnum um eina viku. Tó ein fyrimunur til Riga - bæði liðini standa at hava oddadyst sunnudagin. KÍ í Klaksvík móti NSÍ.

Conference League røkkstøkk umfar - fyrri dysturin
Við Djúpumýru, hósdagin 20. august 
KÍ - Riga FC 0-0 

Sí meira um dystin her