Flogbóltsspælari leikbann fyri happing á sosialum miðli

Flogbóltssamband Føroya tók mikudagain støðu til, at leikandi venjarin hjá SÍ, Mateusz Pazgan, skal hava langt leikbann umframt eitt bann fyri at virka sum venjari í eina tíð.

Mateusz Pazgan fær leikbann í fimm dystir, og hartil kann hann ikki vera venjari ella hava nakran almennan leiklut undir nøkrum dystum í ein mánað.

Orsøkin er, at hann á sosiala miðlinum TikTok, har hann hevur áleið 25.000 fylgjarar, hevur lagt eitt niðrandi og happandi uppslag um dómararnar í triðju FM-finaluni hjá monnum.

Frá starvsnevndini í Flogbóltssambandi Føroya verður sagt, at hendan avgerðin kann fáa avleiðingar fyri steypakappingina, sum er í gongd, tí Mateusz Pazgan uttan iva er ein av bestu leikarunum í føroysku kappingini fyri menn. Men atlitið til, at dómarar og annars eisini øll onnur í føroyska flogbóltsheiminum skulu kunna kenna seg væl og kenna seg trygg, hevur vigað mest í hesum sambandi, tí slík happing - herundir á sosialu miðlunum - undir ongum umstøðum kann góðtakast. At Mateusz Pazgan eisini er venjari, hevur vigað tungt í hesum sambandi.

Nevnast skal, at Mateusz Pazgan eftirfylgjandi hevur biðið um umbering og hevur tikið hetta uppslagið og eitt annað líknandi uppslag av sínum sosiala miðli.