Fult stigatal til Jákup Petur

Tórshavnar Súkklufelag skipaði um vikuskiftið fyri súkkluiapping, og aftur hesaferð var kappast í tíðarkoyring. Og aftur hesa ferð var tað Jákup Petur Eliassen, ið endaði ovast á sigurspallinum. 

Talan var um eitt umfar í Giant TT kappingini, ið er samansett av fimm kappingum í tíðarkoyring, sum Tórshavnar Súkklufelag skipar fyri.

Fyri at kunna vinna kappingina samanlagt, skal súkklari hava luttikið í fýra av teimum fimm kappingunum, og tvær av kappingunum skulu vera koyrdar á vanligari kappsúkklu.

Teinurin leygardagin var tann sokallaði FM-klassikarin úr Havn til Kaldbak og aftur. 28,8 kilometrar við byrjan og máli við plantustøðuna við Hvítanesvegin.

Við einari miðalferð beint undir 40 kilometrar um tíman var tað Jákup Petur Eliassen, ið vann ein tryggan sigur. Nummar tvey gjørdist Gunnar Dahl-Olsen, og nummar trý Andrass Joensen.

Hjá kvinnum var tað Maria S. Hansen, ið vann, og hon tryggjaði sær harvið sjey stig.

Hjá monnum liggur Jákup Petur ovast við fullum stigatali, 14 stigum. Við sigrinum leygardagin, hevur Maria vunnið sær sjey stig. 

Komandi vikuskifti verður aftur kappast, men næsta kapping í Giant TT 2022 kappingini verður í 18. apríl, tá koyrt verður frá Hotel Føroyum, og so allan vegin niðan á Sornfelli.