Heidi Sevdal tryggjaði Føroyum javnleik í Litava

Føroyar spældu seinnapartin tann fyrra venjingardystin í Kaunas móti Litava. Dystirnir eru umráðandi partur av fyrireikingini til EM-undankappingina, sum byrjar í heyst.


(Føroyska byrjunaruppstillingin í Kaunas - Mynd: FSF)

Føroyar byrjaðu væl og fingu brotsspark eftir smáar tíggju minuttir, tá Heidi Sevdal varð togað niður í samaband við eitt hornaspark. Tað tók hon sjálv, og hon smekkaði bóltin heilt niður í vinstra málhorn. Litava fekk tó yvirvágina og skoraði uppá beinleiðis fríspark frá brotsteigarmarkinum miðskeiðis í hálvleikinum. Stutt áðrenn hálvleik legði heimaliðið seg á odda. Aftur var tað eftir ein deyðbólt; ein bóltur sum kom innfyri aftur eftir hornaspark.

Føroyska liðið fekk javnvág í næstan beinanvegin. Birna T. Mikkelsen legði ein langan og beinraknan bólt fram til sín gamla liðfelaga, ið gjørdi eina góða renning afturum litavisku verjuna. Heidi avsluttaði fyrstu ferð; stødd á brotsteigarmarkinum til vinstru. Tað var eitt sera elegant mál - føroyski profilurin lyfti bóltin uppum málverjan, ið var komin eitt sindur út úr málinum. 30 ára gamla Heidi Sevdal hevur nú skorað 21 mál í 49 landsdystum. 

Eftir 2-2 málið høvdu bæði liðini nakrar støður - heimaliðið var kanska nakað nærri við at avgera dystin. Tað komu nakrar broytingar á føroyska liðnum ígjøgnum dystin, og ársins stjørnuskot í føroyskum fótbólti í fjør, Julia Naomi Mortensen, fekk sína debut. Tað verða helst nakrar broytingar í byrjunaruppstillingini til týsdagin, tá liðini spæla aftur. 

Venjingardystur á NFA leikvøllinum í  Kaunas - 7.apríl
Litava - Føroyar 2-2 (2-1)
0-1  9' Heidi Sevdal (br.)
1-1 23' 
2-1 38'
2-2 49' Heidi Sevdal 

Føroyska liðið: Jóna Nicolajsen - Birna T. Mikkelsen, Birita B. Nielsen, Lív F. Arge, Rebekka E. Danielsen ('40 Katrina Akursmørk) - Sara Samson Lamhauge ('79 Olga Kristina Hansen) , Eyðvør Klakstein, Margunn Lindholm (63' Julia Naomi Mortense), Jacoba Langgaard (63' Rebekka F. Benbakoura) - Ásla Johannesen (L) ('79 Sarita Maria Mittfoss), Heidi Sevdal

Venjari: John Petersen

Myndir frá dystinum kunnu síggjast á Facebook-síðuni hjá Fótbóltssamband Føroya