Hondbóltssambandið og Mowi longt samstarvsavtaluna

- Eins og vit sum fyritøka, setur føroyski hondbólturin sær høg mál og vilja vit gjarna vera við og stuðlu tílíkum framfýsnum virksemi.

Soleiðis sigur Hans Jákup Mikkelsen, stjóri á Mowi, ið fegnast um eyðsýndu framgongdina hjá bæði teimum vaksnu og ungu landsliðunum. Fríggjadagin hittust hann og Gunn Ellefsen, forkvinna í HSF á høvuðsætinum hjá Mowi á Heygsstøð á Strondum, har sáttmáli til og við 2024 varð undirskrivaður.

Mowi er ein av stórstuðlunum hjá Hondbóltssambandinum, og partarnir hava havt samstarvsavtalu seinastu árini. Mowi, áður Marine Harvest, er í dag drúgvasti landsliðsstuðul hjá HSF og hevur verið í menningini síðani 2013, skrivar hsf.fo. Øll landsliðini ver vørumerki Rinka á klæðunum.

- Mowi er ein framleiðari, sum stendur fyri nýhugsan, menning og høgum krøvum, og er hetta eisini virðir vit royna at standa fyri í hondbóltinum. Mowi hevur stuðlað og trúð uppá menningina frá tí at vit virkaðu undir meira eyðmjúkum korum, og tað eru vit takksom fyri, sigur Gunn Ellefsen við hsf.fo.