Hópurin til avgerandi dystirnar verður úttikin í morgin

Endaspælsplássið hjá kvinnunum kom uppá pláss sunnudagin, og í mai skulu menninir royna at fáa sítt EM-pláss í hús.

Sí eisini: Føroyar verða minsta landið nakrantíð í einum HM-endaspæli

Hóast túsundtals føroyingar longu hava skrivað seg upp til Oslo-túr í januar, og fleiri helst eisini halda, at EM er uppá pláss, so verður tað møguliga neyðugt hjá Føroyum at fáa okkurt stig afturat. Liðið er í løtuni á odda í bólkinum við fimm stigu fyri fýra stigum, men tað er ógvuliga tætt.

Ein torførur útidystur verður í Kosovo, har hvørki Niðurlond ella Ukraina vunnu, 8. mai, og 11. mai verður seinasti dystur í hesari EM-undankappingini, tá Ukraina vitjar.

Hesin dysturin kann verða heilt avgerandi fyri, hvørt Føroyar koma til annað EM-endaspælið á rað á manssíðuni. Um væl vil til, so kann dysturin eisini verða avgerandi fyri, um Føroyar megnar at vinna bólkin. Tað er fullkomiliga útselt til dystin.

Sí eisini: Stórir trupulleikar við søluni - seinastu 400 atgongumerkini fóru í gjár

Fleiri eru tøkir aftur

Royndu menninir Nicholas Satchwell, Peter Krogh og Jónas Gunnarson Djurhuus eru langtíðarskaddir, meðan fýra spælarar nú eru tøkir aftur, í mun til í dystirnar móti Niðurlondum í mars.

Teir eru Vilhelm Poulsen, Kjartan Johansen og Pauli Mittún - allir úr bakketuni - og strikuspælarin Helgi Hildarson Hoydal.

Tað er ivasamt, um allir hesir eru kominir uppá listan aftur. Vilhelm Poulsen er tó profilur í verjuni og hevur verið fyrstaval á høgra bakki seinastu árini.

Onkutíð vera yvir 16 spælarar úttiknir - 16 mans kunnu vera á dómaraseðlanum til hvønn dyst.

Hópurin, sum Peter Bredsdorff-Larsen og Hjalti Mohr Jacobsen hava tikið út, verður kunngjørdur seinni í morgin, mikudagin.

Savnsmynd: Sverri Egholm

Rættað 22.06: Upprunaliga stóð, at hópurin verður úttikin "í dag"; t.v.s týsdagin 15. apríl