Fótbóltur

Ikki fleiri tilburðir staðfestir í B36

Hópurin er ikki settur í sóttarhald, og fyrireikingarnar hjá B36 til Europa League dystin á Gibraltar halda harvið fram. Tó verður eingin venjing fyrrenn eftir nýggjar kanningar fríggjadagin.

Mynd: Sverri Egholm

Mynd: Sverri Egholm

2020-08-12 20:08 Author image
Agnar Prestá
placeholder

B36 hevur í kvøld góð tíðindi at bera:

Fyrireikingarnar hjá B36 til Europa League halda fram eftir ætlan

- Sum kunnugt varð ein í leiðarahópinum hjá felagnum testaður positivur fyri koronu. Tí bleiv allur hópurin kring Betri-liðnum hjá felagnum testaður aftur í dag, og tíbetur vóru ikki fleiri tilburðir staðfestir. Allur hópurin var í sjálvbodnum sóttarhaldi, til eitt svar uppá testina í dag var greitt.

- Vit hava samskift við landslæknan aftur í kvøld, og niðurstøðan hjá landslæknanum var, at umstøðurnar kring tilburðin vóru av tílíkum slag, at hópurin ikki er settur í sóttarhald.

- Vit kunnu tí halda fram við fyrireikingunum til EL-dyst okkara, og felagið fer at testa allar spælararnar aftur fríggjadagin og mánadagin. Fyri at binda um heilan fingur, verður eingin venjing, fyrr enn vit hava fingið svar upp á testirnar, sum verða tiknir fríggjamorgunin.

Hetta skrivar B36 á heimasíðu sínari, har gjørt verður greitt, at tamarhald er á støðuni, men at fyrvarni verður tikið, og allir í hópinum skulu kannast tvær ferðir afturat. 

B36 skuldi í kvøld spæla á Skála í 16. umfari í Betrideildini, men eftir at ein í leiðarahópinum hjá felagnum testaður positivur fyri koronu í gjár, varð dysturin útsettur. 

placeholder
placeholder