Kyndil vann lyklasigur á StÍF í steypakappingini

Kyndil tapti fyrsta dystin móti H71, men í gjárkvøldið gjørdu teir í grønum bart og vunnu týðandi heimadystin móti StÍF í 2. umfari í bólkaspælinum.

Tað var 14-12 í steðginum, og fyrstu løtuna í 2. hálvleiki fór Kyndil frá. Munurin lá millum sjey og átta mál eina løtu. StÍF kom tó betri við og var á minus tvær ferðir innan seinastu tíggju minuttirnar. 

Tað endaði tó 31-26, og harvið er Kyndil í góðari støðu: Tvey stig og Team Klaksvík á skránni í seinasta umfari.

H71 spælir í Klaksvík sunnudagin, og gongst tað sum væntað, so leggja hoyvíkingar seg á odda í bólkinum, sum tvey lið koma víðari úr.

Harvið er lagt upp til, at StÍF skal vinna við fleiri málum í Hoyvík í seinasta umfari (11. desember), um liðið av Skálafjørðinum skal hava ein møguleika at koma víðari.

Faxe Kondi-kappingin hjá monnum - 2. umfar
Hósdagin 21. november
Kyndil - StÍF 31-26 (14-12)

Toppskjúttar: Tobias Thisen 8 mál, William Skovsager og Høgni Klein Olsen 6 mál (Kyndil) 

Trúgvi Hávardsson 6 mál (StÍF)

Sí dómaraseðil og dystargongd her

Sunnudagin 24. november
16.00: Team Klaksvík - H71

Skýggjamynd: HSF - tvey lið koma víðari til hálvfinalurnar

Í hinum bólkinum hava VÍF og KÍF fyrimunin eftir fyrsta umfar. H71 2 tekur ímóti VÍF í morgin, og vestmenningar kunnu næstan spæla seg víðari. Týðandi dysturin millum Neistan og KÍF, sum skuldi verða mikukvøldið, varð úrsettur vegna veður.