Niels Pauli Danielsen
Fýra dystir vóru á skránni í Premier League hóskvøldið. Í harða stríðnum um topp-4 vunnu bæði Leicester og Manchester United sínar dystir. Í botninum fekk Aston Villa eitt stig og kann framvegis bjarga sær enn eitt ár í Premier League.
Leicester hevði vitjan av Sheffield United. Leicester vann dystin 2-0 við málum frá Ayoze Perez og Demari Gray. Manchester United, sum kappast við Leicester um Champions League plássini, vann eisini 2-0, tá teir vóru á vitjan hjá Crystal Palace. Tað vóru Marcus Rashford og Anthony Martial, sum skoraði málini fyri United.
Á Goodison Park spældu Everton og Aston Villa 1-1. Ezri Konsa legði Aston Villa á odda 18 minuttir fyri tíð. Leiðslan hjá Aston Villa helt líka til tríggir minuttir vóru eftir, tá Theo Walcott javnaði til endaliga úrsliti 1-1.
Seinasti dysturin hóskvøldið var ímillum Southampton og Brighton. Tann dysturin endaði eisini við einum 1-1 javnleiki. Neal Maupay legði Brighton á odda, meðan Danny Ings skoraði útjavnandi málið fyri Southampton.
Vinarliga broyt tínar kennifíla - og privatlívsstillingar fyri at síggja hetta innihald