Annað

Lukaku ger Maradona eftir

Romelu Lukaku heldur á við at skora og seta met fyri Belgia.

2018-06-23 16:45 Author image
Agnar Prestá

Romelu Lukaku er flúgvandi í Russlandi. 25-ára gamli áleyparin skoraði í dag tvey mál í 5-2 sigrinum hjá Belgia á Tunesia. Lukaku skoraði eisini tvey mál ímóti Panama í 3-0 sigrinum í fyrsta dystinum.

At skora meira enn eitt mál í tveimum dystir á rað í einum HM-endaspæli er óvanligt. Hetta er ikki hent síðani 1986. Tá var tað ein ávísur lítil og genialur leikari hjá Argentina, ið framdi hetta. Diego Maradona skoraði tvey mál í bæði kvartfinaluni og í hálvfinaluni í endaspælinum í Meksiko. Gott nokk var tað fyrsta av hesum fýra málunum skorað við hondini, men einki bilti hinum málinum ímóti Onglandi. Argentina vann 2-1, og í hálvfinaluni skoraði bóltsnillingurin bæði málini í 2-0 sigrinum á Belgia. 

Júst Belgia eigur nú ein tvífaldan málskjútta í tveimum fylgjandi dystum. Hetta eru ikki eins avgerandi mál í eins avgerandi dystum, sum Maradona skoraði síni í. Men tað er eingin ivi um, at Belgia og Lukaku hava fingið eina góða byrjan í Russlandi. Og so er spurningurin, um Lukaku kann verða við til at føra Belgia til heiðurs, eins og Maradona gjørdi tað í 1986.

Sterki áleyparin úr Manchester United varð tikin út tíggju minuttir inn í 2.hálvleik í dag, tá dysturin var avgjørdur. Lukaku fekk ein snudd, og varð harvið spardur. Tað kann hugsast, at hann hevði skorað fleiri enn tvey mál, um hann varð verandi á vøllinum.

Romelu Lukaku skrivaði meira søgu í dag, tí við málunum er hann tann belgiski leikarin við flest málum í endaspølum í søguni. Í HM 2014, EM 2016 og so í tveimum teimum fyrstu dystunum í Russlandi er Lukaku komin uppá 7 mál í endaspølum. Lukaku hevur 17 mál í teimum seinastu ellivu dystunum fyri Belgia, har hann bert er farin av vøllunum uttan at skora. 

Sosttat er mest skorandi leikarin á belgiska landsliðnum nakrantíð glóðheitur. Eftir tveir dystir er hann deildur toppskjútti í HM saman við Cristiano Ronaldo

Belgia er so gott sum víðari til áttandapartsfinaluna, og spælir seinasta bólkadystin ímóti Onglandi hósdagin. Har er Lukaku meldaður ivasamur.