Maria Nólsoy og tær eru í ovara endaspælinum

Fimm dystir í næstseinasta umfari í grundspælinum í Kvindeligaen vórðu spældir í kvøld. Tríggir føroyskir landsliðsspælarar vóru í eldinum í týðandi dystum.

Tvær av teimum eru í tøttum stríði um 4. og 5. plássið. Tætt er millum København (Pernille Brandenborg), Viborg (Jana Mittún) og Nykøbing Falster Håndbold. Eftir dystirnar í kvøld liggur NFH best fyri til 4. plássið, sum gevur stig við sær víðari til ovara endaspælið. Harafturat endar man í "betra" bólkinum, í mun til møguleikar at vinna hálvfinalupláss.

NFH vann sum væntað á Aarhus í kvøld. København gjørdist ikki tað fyrsta liðið at vinna stig móti Odense; tað endaði 36-27 í Odense. Pernille Brandenborg skoraði trý mál uppá fýra skot.

Jana Mittún skoraði uppá sítt einasta skot í dystinum í Skanderborg  - Súna Krossteig Hansen spældi heldur ikki hesaferð fyri botnliðið vegna skaða. Jana legði upp fýra mál og vann Viborg eitt brotskast.

Jana Mittún og tær hjá Viborg kundu fegnast um sigurin, sum heldur lív í vónini um 4. plássið (Mynd: Sverri Egholm)

Tað endaði 27-23 til Viborg, sum harvið vann seg undir liðuna á København. Bæði eru eitt stig aftanfyri NFH og skulu harvið vóna, at NFH óvæntað tapir fyri Silkeborg-Voel í seinasta umfarinum í grundspælinum leygardagin.

Maria Pálsdóttir Nólsoy gjørdi bart

Tá fer Silkeborg ikki at hava heilt nógv at spæla fyri. Hetta er Horsens at takka. Horsens vann spenanndi heimadystin móti júst Silkeborg-Voel og tryggjaði sær harvið 8. plássið, sum er seinasta plássið í ovara endaspælinum. 

Harvið kunnu Silkeborg-Voel og Ringkøbing (Rakul Wardum) ikki røkka hesum longur. Trý stig eru nú upp til Horsens og bert eitt umdar eftir.

Sí eisini: Ringkøbing vann lyklasigur í Aalborg - kann røkka ovara endaspælinum

Maria Pálsdóttir Nólsoy spældi stóran leiklut í, at hennara lið ikki longur kann flyta niður úr bestu donsku deildini. 20-ára gamli føroyski bakspælarin skoraði seks mál (næstflest hjá heimaliðnum), umframt at hon legði upp til trý mál - harímillum vóru tvey vunnin brotskøst - í 32-31 sigrinum.

Flott avrik og umráðandi sigur hjá teimum gulkløddu. Maria, sum er góð til at fáa ferð í spælið og at meta um í spælinum, fær eisini stóran leiklut fyri landsliðið til HM-lagnudystirnar móti Litava í næstu viku.

Maria Pálsdóttir spældi heilt væl í lykladystinum í kvøld (Mynd: Sverri Egholm)

Fagnaður á Mariu og øllum teimum í gulum og svørtum (Mynd: HH Elite)

Claus Mogensen var venjari hjá liðnum fram til EM-steðgin. Føroyski landsliðsvenjarin skuldi halda fram restina av kappingarárinum, men so framdi liðið venjaraskifti. Eftir jól hevur tað sum heild gingið væl hjá Horsens, sum fær harðar men spennandi dystir móti teimum fremstu restina av kappingarárinum.

Sí stigatalvuna og meira um deilduna her