Ringkøbing vann lyklasigur í Aalborg - kann røkka ovara endaspælinum

Sjóneykan var á ítróttardepilin "Skansen" í Nørresundby í gjárkvøldið, tá TV2 Sport sendi annan av dystunum, sum varð spældur í "Kvindeligaen" á degnum. Talan var um botnbrak millum EH Aalborg  og Ringkøbing Håndbold.

Heimaliðið kundi lyfta seg nakað burtur frá aftasta plássinum, men tað var Ringkøbing, sum ístaðin fór frá og helt lív í møguleikanum um at koma í ovara endaspælið. 

Aalborg var uttan Anniku Fríðheim Petersen (við barn) og Lív Sveinbjørnsdótir Poulsen (ikki í hópinum). Heimaliðið var á odda í steðginum, hóast Rakul Wardum var komin inn og hevði havt eina stóra duppultbjarging í seinasta minutti av 1. hálvleiki.

Rakul spældi seinastu fimm minuttirnar fyri steðgin og fyrra helming av 2. hálvleiki, men hon og verjan fingu ikki heilt tamarhald á 7 móti 6-spælinum og ymisku skotunum. Samanlagt hevði føroyski landsliðsmálverjin fimm bjargingar men kom ikki upp ímóti bjargingarprosentunum frá seinasta dysti, har 22-ára gamla havnarkvinnan varð dagsins spælari. 

Sí eisini: Rakul Wardum besti málverji í umfarinum

Tað var kappingarneytin/samstarvsfelagin Stephanie Andersen, sum hesaferð stóð frálíka væl móti endanum. Royndi málverjin kom inn aftur, bjargaði beinanvegin fríum skoti hjá strikuni og síðani millum annað einum brotskasti. Samstundis koyrdi álopsspælið hjá Ringkøbing væl, og tær á útiliðnum kundu at enda fegnast um ein 33-30 sigur. Aalborg er framvegis javnsett í stigum við Skanderborg - bæði hava tíggju stig, og eingin í deildini hevur færri. 

Støðan í deildini sæst her

Ikast vann í gjár 29-26 á Sønderjyske. Claus Mogensen, føroyskur landsliðsvenjari er hjálparvernjari har.

Hørð kapping um avgerandi pláss

Rakul Wardum og Ringkøbing eru í løtuni á 9. plássi - eitt stig frá 8. plássi. 8. pláss er nærum gandakent, nú grundspælið fer at enda, tí endar man har tá, so er heilt víst, at man fær eitt ár afturat í fremstu deildini.

Tað hevur sum heild verið tætt millum sjey tey niðastu liðini í ár. Nú er greitt. at trý lið hava møguleikan at enda á 8. plássi. Ringkøbing livir í vónini eftir sigurin í gjár, men tað er neyðugt, at Horsens (HH Elite) tapir í kvøld, tá liðið spælir sín dyst í næstseinasta umfarið.

Horsens er liðið hjá Mariu Pálsdóttir Nólsoy og er í løtuni nummar 8. Eitt stig frammanfyri Ringkøbing og Silkeborg-Voel.

Júst Silkeborg-Voel vitjar Horsens í kvøld. Vinna Maria og tær er 8. plássið endaliga tryggjað, og skal liðið hjá 20-ára gamla føroyska landsliðsspælaranum so í ovara endaspælið. Eydnast tað ikki, so verður tað ein gysari millum trý lið leygardagin, tá seinasta umfar er á skránni.

Maria Pálsdóttir Nólsoy hevur spælt fleiri góðar dystir í seinastu fyri Horsens, sum hevur vunnið nógv stig í seinnu hálvu. Í kvøld er lagnudystur á skránni (Mynd: Sverri Egholm)

Dysturin í Horsens byrjar klokkan 19. Hálvan tíma frammandundan skulu aðrir føroyskir landsliðsspælarar í eldin: København Håndbold (Pernille Brandenborg), Viborg (Jana Mittún) og NFH eru í tøttum stríðið um 4. plássið, sum gevur stig við víðari og betri møguleikar í endaspælinum.

København hevur greitt torførasta dystin í kvøld: Ósigraða oddaliðið Odense á útivølli. Jana og tær spæla móti botnliðnum Skanderborg - Súna Krossteig Hansen hevur verið leingi úti við skaða og hevur harvið ikki fingið hjálpt heimaliðnum. Hon er eisini ógvuliga ivasom til landsdystirnar móti Litava í næstu viku.